U mblodhën të gjithë bashkë për një qëllim të vetëm.
Qytetarë të shumtë dolën këtë të shtunë të protestojnë me një kërkesë – mos të ketë shtrenjtim të energjisë elektrike.
Me pankarta në duar, e të shumtë në numër, protestuesit kërkonin mos të këtë ndryshim të tarifave.
I pari mori fjalën aktivisti Besnik Shabiu.
“Në periudhën që ne po jetojmë duke pasur parasysh qe jemi populli më i varfër ne Evropë i cili është i zhytur në kredi dhe borxhe nuk e meriton nga asnjë institucion e as qeveri që të vështirësohet jeta. Kërkesa jonë ndaj ZRRE dhe ndaj Ministrisë së Ekonomisë, është shumë konkrete dhe e qartë: Të pezullohet vendimi për shtrenjtimin për 15% e energjisë elektrike të rihapet një diskutim i gjerë ku edhe ne bashkëpunojmë dhe të bëhet një plan i qartë afatgjatë, një strategji”.
E më pas, foli edhe organizatori tjetër, Ali Sefaj.
“Ti marrin parasysh kërkesat tona ose protestat tona do të masivizohen deri sa ata t’i përfillin ato,…. asnjë cent më shumë”.
Pas fjalimeve, protestuesit morën rrugën drejt objektit të Ministrisë së Ekonomisë.
E kur ndalesën e fundit e patën te ministria, aty doli të flasë aktivisti Dibran Hoxha.
“KEDS-i çdo ditë thotë na u kanë rrit shpenzimet, a KEK-u që është ndërmarrje publike punon në kushte të mjerueshme për m’ia siguru fitimin KEDS-it dhe në kurriz të kësaj krejt qeveria krejt ministria po ia bëjnë shërbimin KEDS-it, ku është problemi a po na kallxoni cfarë shantazhi jeni te perjetu”.
Krejt në fund, pankartat i vendosën para hyrjes së objektit të Ministrisë së Ekonomisë.
E qytetarët nuk kanë shpresë se kjo protestë, do të ketë ndonjë lloj ndikimi.
“Personalisht jam skeptik, duke u bazu në këtë qeveri që katër vjet e ka sjell popullin në këtë gjendje në këtë mjerim”, thotë protestuesi Remzi Reka.
“Gjasat për ndryshimin e vendimit janë të vogla sepse Albin Kurti po sillet si një despot me qytetarët e Kosovës, megjithatë shpresat nuk humbin por vështirë se do të zmbrapset”, tha protestuesi tjetër, Fetah Dragusha.
“Edhe ai që nuk del në protestë inshaAllah 1500% iu shtrenjtohet jo 15, ky popull nuk e di çka është puna e tij, a mos pe mendojnë që është te liru 15 % e jo të kundërtën”, tha protestuesi tjetër, Maliq Mehmeti.
Nëse Zyra e Rregullatorit të Energjisë nuk merr vendim për mosngritjen e çmimit të rrymës, organizatorët paralajmëruan edhe protesta të tjera.
