Të enjten do të tentohet për herët të nëntë konstituimi i Kuvendit, ku në rend dite është zgjedhja e kryetarit të Kuvendit.
Por, para seancës së Kuvendit që është paraparë të nis nga ora 10:00, kryeministri në detyrë dhe kryetari i LVV-së, Albin Kurti do të zhvillojnë një takim i cili sipas ftesës së Kurtit ka për qëllim një marrëveshje për konstituimin e Kuvendit.
Ftesa e Kurtit ka shkuar edhe për kryetarin e LDK-së, Lumir Abdixhiku i cili për dallim nga Memli Krasniqi ka refuzuar ftesën.
E propozuara e LVV-së për kryeparlamnetare ka dështuar në shtatë tentime të marrë votat e mjaftueshme për tu zgjedhur kryetare e Kuvendit.
Nga PDK e AAK i kanë bërë thirrje LVV-së të ndërrojë kandidaten duke e vlerësuar Haxhiun si figurë përçarëse.
Kurse, LDK ka thënë se nuk e voton asnjë të propozuar nga partia fituese e zgjedhjeve të 9 shkurtit.
LVV-ja deri më tash nuk ka ndryshuar qëndrim nga kandidatura e tyre duke thënë se opozita nuk mund t’ua imponojë kandidatin.
