Shumë flamuj e pak qytetarë u panë në protestën e organizuar nga Lista Serbe në Mitrovicën e Veriut.
Disa nga banorët e pjesës veriore nuk e morën as mundin të dalin në rrugë, ata po e përcollën protestën nga ballkonet e tyre.
Madje as nuk e kishin problem që më të vegjlit e tyre ti ngarkonin me çështje politike.
E disa të tjerë po i përjetonin me emocion këngët nacionaliste serbe.
Kishte edhe nga ata që kërkonin ndihmë nga Kombet e Bashkuara.
Kurse kryetari i Listës Serbe, Goran Rakiq, kërkoi nga Qeveria e Kosovës, ta themeloj Asociacionin e komunave me shumicë serbe.
“Ne do ta vazhdojmë luftën tonë në atë që është e shkruar në marrëveshjet e Brukselit, siç është formimi i Asociacionit të Komunave serbe, duke i plotësuar të gjitha kushtet ashtu siç është nënshkruar në Bruksel. E përshëndesim kryetarin Aleksandar Vuciq dhe shtetin tonë Serbinë”, tha Rakiq.
Po të njëjtën kërkesë e kishte edhe nënkryetari i kësaj partie, Igor Simiq.
Tutje, në fjalimin e tij para qytetarëve ai përmendi personin që është i kërkuar nga Policia e Kosovës, Milan Radoiciqin, të cilin e cilësoi si vëlla të popullit serb.
“Para disa ditësh, Kurti tha se s’ka komuna serbe në Kosovë, tash s’ka institucione të Prishtinës në veri të Kosovës. Në fund dua të theksoj se barra e kësaj beteje për popullin serb i takon personit që ndoshta ka barrën më të madhe për disa vite, vetëm se do dhe e mbron popullin serb dhe gjithashtu e do shtetin e vet Serbinë, dhe për këtë ju ftoj për një duartrokitje përkrahëse për patriotin më të madh, i cili nuk iu nënshtrua presioneve, vëllain tonë Milan Radoiciqin”, tha Simiq.
Përveç politikanëve, edhe gjyqtarët e prokurorët serbë vendosën unanimisht që të largohen nga sistemi gjyqësor i Kosovës.
“Ne vendosëm unanimisht të largohemi nga sistemi gjyqësor dhe t’i bashkohemi të gjithëve në këtë luftë. Vendimi ynë është i qartë. Mendoj se jemi ambasadorët më të mirë të gjyqësisë serbe”, tha Liljana Stefanoviq – ish- kryetarja e Gjykatës Themelore të Mitrovicës.
E pas protestës rreth 300 policë nga katër stacionet e komunave veriore të Kosovës kanë dorëzuar në stacionin e policisë në veri të Mitrovicës të gjitha pajisjet e tyre, ndërsa të njëjtën gjë do ta bëjnë të hënën edhe rreth 150 policë të tjerë.
Kronika e realizuar nga gazetari Shpat Blakçori
