Përmes një postimi në Facebook, ai thotë se kjo kërkesë nuk është politike por që garanton sigurinë e vendit e veçanërisht sigurinë në veri të vendit.
“Populli i Kosovës dhe aleatët tonë të sigurisë i dijnë shumë mirë qëllimet e Serbisë, sponzorëve dhe satelitëve të saj. Por; Shtetet e Bashkuara të Amerikës përmes zyrtarëve të saj, që nga Ambasadori Hovenier e deri te Sekretari i Shtetit z.Blinken, kërkuan nga Kosova pezullimin e vendimit për targat deri në Marrëveshjen Finale; Kësaj kërkese iu bashkuan edhe vendet e QUINT-it por edhe vendet e tjera të NATO-s, aleate tonat në siguri; Kjo kërkesë nuk është vetëm politike por garanton sigurinë e vendit tonë e veçanërisht sigurinë e rendin në veri të vendit”, thuhet në postim.
Sipas tij, kryeministri Albin Kurti as në opozitë dhe as në pushtet me bashkëpunëtorët e tij s’janë të interesuar për sigurinë e vendit.
“Ata që dalin jashtë kësaj kërkese nuk punojnë në interes të sigurisë së vendit tonë e as të zbatimit të ligjit. Kurti me demagogët e vet, qoftë në qeveri e qoftë jashtë saj, nuk janë me aleatët e sigurisë dhe as nuk janë të interesuar për sigurinë e Republikës së Kosovës; Kjo situatë është bardh e zi. Në vend që të vazhdohet me demagogji, menjëherë duhet të pranohet kërkesa e Amerikës, QUINT-it dhe aleatëve të tjerë të NATO-s për shtyrjen e vendimit për targat deri në Marrëveshjen Finale”, shkroi ndër tjerash ai.
Ndryshe, që nga 1 nëntori ka filluar faza e qortimit për serbët që bartin targa ilegale serbe në Kosovë.
Ndërkaq, duke filluar nga 21 nëntori të gjithë ata që bartin këso targash do të gjobiten nga Policia e Kosovës.
E lidhur me këtë, të dielën kanë protestuar serbët në sheshin “Carl Lazar” në Mitrovicën Veriore.
Kurse, Shtetet e Bashkuara të Amerikës kanë kërkuar nga Kosova që së paku ky vendim të shtyhet për 10 muaj./teve1.info/
