Afrim Veseli tri dekada më parë këtu për herë të fundit, u takua me heronjtë, Afrim Zhitinë e Fahri Fazliun.
Kjo pasi demonstratën e nisur në qendër të Prishtinës ditën e 1 nëntorit të vitit 1989, e zhvendosën në këtë rrugë të kryeqytetit.
Kjo sipas tij, u bë me një arsye.
“Këtu kemi rezistuar 2 deri në 3 orë këtu, sepse kishte gurë të mjaftueshëm për me i rezistuar policisë, këtu ka qenë një furrë e bukës…rruga ishte e ngushtë, i shihnim kah po na vinin…”, tregoi ai.
Ish-koloneli i FSK, i kujton edhe fjalët e fundit që shoku i idealit, Afrim Zhitia, ia tha 33 vjet me parë.
“U ardh Afrimi këtu, me ka kap për dore e me ka thënë KRESHNIK, sepse I kemi pas disa pseudonime që I kemi vendos, me tha që ti duhet me shku në shtëpi, se u vra djali axhës, Ganiu, dhe me shprehu ngushëllime”, u shpreh ai.
Pas kësaj demonstrate, forcat serbe ranë në gjurmët e dy heronjve.
Të nesërmen më 2 nëntor të vitit 1989, Afrim Zhitia e Fahri Fazliu, do të rrethoheshin nga forca të shumta serbe, në lagjen Bregu i Diellit në Prishtinë.
E luftimet mes dy heronjve dhe qindra forcave serbe, zgjatë gati 10 orë.
Ndërkohë, lajmi për rënien e dy llapjanëve, tronditi shokët e idealit.
“Thosha jo more, s’munet me kanë Afrimi, s’munden me vra Afrimin, jo more çfarë, nuk munden me vra Afrimin. Po fatkeqësisht Afrimi ish vra për me lind për së dyti. Afrim Zhitia, që të përshkruhet është shumë e vështirë, çdo pore e trupit të tij, ka qenë atdheu e Kosova”, u shpreh ai.
10 vjet më vonë, gjatë luftimeve me forcat serbe u vra edhe vëllai i Fahri Fazliu, Bahriu.
Kronika e gazetarit Fidan Zejnullahu.
