Në këtë organizim të iniciuar nga kancelari gjerman Olaf Shcolz, pritet që të diskutohen edhe çështje të tjera rreth aktualitetit në rajon.
Besohet që plani franko-gjerman, do të jetë temë diskutimi në margjinat e këtij samiti.
Madje njohësi i çështjeve politike Shkelzen Maliqi thotë se nuk përjashtohet mundësia e organizimit të takimeve të tjera.
“Në të gjitha forumet instanca po diskutohen. Tash edhe shumë detaje të këtij propozimi gjermano – francez, pak a shumë po dihen, kështu që nuk e përjashtoi mundësinë që atje të aranzhohet eventualisht një takim i ri dy palësh”, tha Maliqi.
Çështje tjetër me të cilën po përballet Kosova dhe Serbia është edhe ajo për targat. Por, pavarësisht kësaj, drejtori ekzekutiv i Institutit Epik, Demush Shasha, thotë se plani franko-gjerman do të jetë tema kryesore e diskutimit.
“Unë besoj që e gjithë vëmendja do të jetë tek propozimi franko-gjerman dhe dakordimi i palëve për atë propozim. Unë besoj që më pak do të ketë vëmendje te çështja e targave, sepse në kuptimin e urgjencës ajo çështje është adresuar pasi që qeveria tanimë ka dhënë kohë, ka përshkallëzuar zbatimin e vendimit dhe defakto ka dhënë kohë për zbatimin e vendimit. Pra, ajo çështja, ajo ndjenja e urgjencës është larguar nga tavolina dhe është diskutuar hapësirë për diskutimin e çështjeve të rëndësishme respektivisht për propozimin franko gjerman”, deklaroi Shasha.
Përveç liderëve të Ballkanit, në këtë samit do të marrinë pjesë edhe përfaqësues të institucioneve e vendeve te BE-së.
Kronika e gazetarit Valmir Gallopeni.
