Urdhri i presidenti serb ishte që të mobilizohet ushtria serbe për shkak të situatës në Kosovë.
E kjo nuk është hera e parë që Vuçiq e mobilizon ushtrinë dhe e përmend mundësitë e një konflikti potencial në Kosovë.
Ndërsa në një përgjigje për tëvë1, KFOR-i ka deklaruar se janë duke monitoruar nga afër situatën në terren.
Gjithashtu ata njoftuan se Komandanti i KFOR-it, ditë më parë ka zhvilluar takim me shefin e Shtabit të Përgjithshëm të Forcave të Armatosura Serbe, Milan Mojsiloviq.
“Komandanti i KFOR-it mbetet në kontakt të ngushtë me të gjithë bashkëbiseduesit kryesorë, përfshirë përfaqësuesit e institucioneve në Kosovë dhe të Organizatave të Sigurisë së Kosovës e gjithashtu të Shtabit të Përgjithshëm të Forcave të Armatosura të Serbisë. Komandanti i misionit të KFOR-it të udhëhequr nga NATO, gjeneral – major Angelo Michele Ristuccia, së fundi u takua me shefin e Shtabit të Përgjithshëm të Forcave të Armatosura Serbe, gjeneralin Milan Mojsiloviq, në Beograd. Ata diskutuan për situatën e sigurisë dhe nënvizuan rëndësinë e bashkëpunimit të vazhdueshëm në dobi të stabilitetit rajonal”, thuhet nw deklaratwn e KFOR-it.
Përkitazi me këto zhvillime ka reaguar deputeti nga radhët e Lidhjes Demokratike të Kosovës, Anton Quni. Sipas tij, çdo lëvizje ushtarake e Serbisë brenda territorit të Kosovës, do të kishte pasoja katastrofike për ta.
Ndërkaq, njohësi i çështjeve politike, Belgzim Kamberi, thotë se presidenti serb, Aleksandër Vuçiq, po e përdorë këtë gjuhë për të përfituar politikisht.
Sipas Kamberit, Vuçiq nuk ka guxim te hyjë në luftë me Kosovën.
Edhe Shefi i ekzekutivit kosovar, Albin Kurti, e ka përmendur disa herë rrezikun për luftë që vjen nga Serbia.
Kronika e gazetarit Shpat Blakçori
