Në një intervistë për “Kosovo Online”, Radojeviq është shprehur se targat janë kryetemë për qytetarët.
“Situata në Mitrovicë të Veriut është e qetë, si në ditët e kaluara. Qytetarët i kryejnë aktivitetet e tyre të përditshme, por vërehet se janë të mërzitur, sepse në çdo hap flitet për targat dhe lëvizjet e njëanshme të Prishtinës”, ka thënë Radojeviq.
Sipas tij, përfaqësuesit e serbëve po apelojnë vazhdimisht te qytetarët që të mos bien në provokime të mundshme.
“Ne si përfaqësues politikë jo vetëm këto ditë, por javë e muaj më parë jemi përpjekur ta ruajmë paqen, jo vetëm në veri të Mitrovicës, por në gjithë territorin e Kosovës e M. Ne bisedojmë me qytetarët, ndikojmë që ata të qëndrojnë të përmbajtur, apelojmë që të kenë besim në udhëheqjen e tyre shtetërore, në ekipin tonë negociator dhe në shtetin e Serbisë”, tha Radojeviq.
Po ashtu, ai thotë se pret që të garantohet liria e lëvizjes dhe se nuk i respektojnë vendimet e njëanshme të Prishtinës.
“Lëvizja në veri të Kosovës është absolutisht e mundur për të gjithë. Liria e lëvizjes u ofrohet të gjithëve, përfaqësuesve të KFOR-it, EULEX-it dhe përfaqësuesve të Policisë së Kosovës. Nuk ka asnjë problem, dhe përderisa ata kryejnë detyrat e tyre në përputhje me ligjin dhe prioritet e kanë mbrojtjen e qytetarëve, nuk do të ketë probleme. Por nga ana tjetër presim që edhe ne të na garantohet liria e lëvizjes, që liria jonë e lëvizjes të mos na kufizohet me afate dhe vendime të njëanshme të Prishtinës”, tha Radojeviq.
Ndryshe, nga 1 nëntori deri më 21 nëntor Policia e Kosovës do të japë fletëqortime për qytetarët që kapen me targa ilegale, ndërsa nga 21 nëntori deri më 21 janar do të ndajë gjoba nga 150 euro.
