Këtë lajm për “Betimi për Drejtësi” e ka konfirmuar u.d. Kryeprokurori i Shtetit, Besim Kelmendi.
Sipas Kelmendit, prokurori Qalaj është caktuar në këtë pozitë në bashkëpunim me prokurorët e zyrës.
“Në kolegjium në bashkëpunim me krejt prokurorët e zyrës është caktuar sipas alfabetit, d.m.th. që ka qenë me shkronjën A dhe i ka ra atij me qenë i pari, kjo ka qenë edhe arsyje pse ai është caktu”, tha Kelmendi.
I pyetur se kur është marrë vendimi që prokurori Qalaj të jetë zëvendës kryeprokuror i Shtetit, Kelmendi ka thënë se një vendim i tillë është marrë në kolegjiumin e parë të zyrës së prokurorëve.
“Në momentin që unë jam caktu nëse nuk gaboj është kolegjiumi i parë apo i dytë që është caktu”, tha Kelmendi.
Ndryshe, këtë pozitë për më shumë se 7 vite e ka mbajtur prokurorja Sevdije Morina.
Prokurorja Morina, ishte caktuar në pozitën e zëvendës Kryeprokurores së Shtetit më 2 shkurt 2015, me vendim të ish- kryeprokurorit të Shtetit, Aleksandër Lumezi.
Tashmë e njëjta ushtron vetëm detyrën e prokurores në Zyrën e Kryeprokurorit të Shtetit.
Se prokurori Qalaj është caktuar në pozitën e zëvendës Kryeprorkurorit të Shtetit, tashmë figuron edhe në ueb-faqen zyrtare të KPK-së, mirëpo tek fotografia e të njëjtit nuk ka asnjë përshkrim se kur prokurori Qalaj është caktuar në këtë pozitë.
