Përmes njoftimit, ORCA ka bërë të ditur se kanë shpërndarë maska me “fytyrat e frikshme të atyre që janë përreth plagjiaturës së përbashkuar”, duke aluduar kështu në disa profesorë që akuzohen për plagjiaturë.
“Sot për Halloween, na aktivistët e ORCA-s vendosëm të dalim e të shpërndajmë maska me fytyrat e frikshme të atyre që janë përreth plagjiaturës të përbashkuar. Nuk ka gjë më të frikshme se shkatërrimi i arsimit të një vendi që shumicën dërrmuese të popullsisë e ka më të re se mosha 35 vjeçare. Nuk ka gjë më të frikshme se kur plagjiatorët guxojnë të jenë në pozita udhëheqëse edhe pasi janë vërtetuar dyshimet për plagjiaturat e tyre”, thuhet në postim.
Sipas njoftimit, në maskat e shpërndara shihen fytyrat e deputetëve Bujar Dugolli e Ardian Kastrati si dhe profesorit Selim Bezeraj.
“Prandaj, sot, për Halloween ne do të shpërndajmë maska të frikshme me fytyrat e frikshme të arsimit të lartë, të Universitetit të Prishtinës, le ta dijnë të gjithë sa e frikshme është situata në të cilën ndodhemi si shoqëri e në të cilën ndodhet universiteti më i rëndësishëm i vendit tonë”, njofton ORCA./teve1.info/
