Rrugën kryesore për në sheshet e kryeqytetit, po e frekuentojnë vetëm këmbësorët.
E shtuna është dita e dytë, ku po vazhdon testimi për shndërrimin e gjithë unazës qendrore në qarkore një-kahëshe për automjete.
Edhe në këtë ditë, janë bllokuar udhëkryqet.
E një informacion të tillë, nuk e kishte as ky qytetar i Prishtinës.
Vozitësit tregojnë se sa kohë po shpenzojnë në trafik këto dy ditë.
Në anën tjetër, këto bllokime po shihen si normale nga ekspertët e komunikacionit.
I ftuar në emisionin “Info Nata”, eksperti Muhamet Krasniqi thotë se këto testime bëjnë zgjidhje më të mirë për qarkullim.
“Mirëpo, a ka pas hapësirë të gjendet ndonjë formë tjetër?, ndoshta njoftimi duhej të bëhej disa ditë më herët, jo në kohën kur u bë. Për mua më shqetësuese është që u bllokuan shërbimet emergjente brenda qytetit, domethënë të gjitha rrugët që të dërgonin tek spitalet ishin të bllokuara. Pra, shqetësimi im do të adresohej që rrugët, kolonat dhe shiritat rrugorë të cilët janë të destinuar për qarkullimin e mjeteve emergjente, sot fatkeqësisht ishin të zëna gjatë gjithë kohës”, tha ai.
Kjo është hera e tretë që Komuna e Prishtinës po bën testimin e unazës qarkore të kryeqytetit.
Kronika e realizuar nga gazetarja Fetije Kamberi.
