Përmes njoftimit, Dogana thotë se në Raport theksohet që është përmirësuar në vazhdimësi shkëmbimi sistematik elektronik i të dhënave të akcizës me doganat tjera.
“Raporti thekson se Dogana e Kosovës gjatë periudhës raportuese së bashku me agjencionet e tjera të zbatimit të ligjit ka bërë përparim në luftimin e llojeve të ndryshme të kontrabandës, përfshirë këtu edhe parandalimin, shtypjen dhe ndjekjen e kontrabandës së narkotikëve, sikurse që është theksuar se ka rritje domethënëse në aktivitete të orientuara drejt luftimit të ekonomisë jo formale dhe evazionit fiskal, duke konkluduar se Dogana e Kosovës dhe agjencinë e tjera të zbatimit të ligjit bashkëpunojnë mirë për të luftuar informalitetin dhe mashtrimet doganore. Ndërkaq bazuar në aktivitetin e Doganës së Kosovës është arritur që të shkarkohen 10 zyrtar dhe të suspendohen 12 zyrtar tjerë”, thuhet në njoftim.
Tutje, Dogana thotë se Raporti ka theksuar si gjetje pozitive edhe nënshkrimin e marrëveshjes për programin “Doganat” i cili mbështet bashkëpunimin mes autoriteteve doganore në BE dhe atë për kontrollin e përbashkët në transportin hekurudhor me Doganën e Maqedonisë së Veriut.
“Edhe në fushën e lehtësirave raporti thekson si të rëndësishëm progresin për miratimin e pestë të operatorit ekonomik të Autorizuar. Në lidhje me sfidat e adresuara ndër vite për pagesat për përdorimin e terminaleve, raporti ka adresuar progresin e bërë me hapjen e terminalit të parë publik, ndërsa që progresi i më vonshëm nuk është raportuar ende në raport dhe do të pasqyrohet në raportet e ardhshme”, thuhet tutje në njoftim.
Po ashtu, Dogana thotë se në raport te kapitulli i krimit të organizuar thuhet se ka performuar mirë dhe se Dogana së bashku me agjencionet tjera dhe institucionet e linjës po bashkëpunojnë mirë për luftimin e ekonomisë joformale dhe krimeve.
“Tek kapitulli i krimit të organizuar, veç tjerash raporti thekson se Dogana e Kosovës ka performuar mirë dhe se Dogana së bashku me agjensionet tjera dhe institucionet e linjës po bashkëpunojnë mirë për luftimin e ekonomisë jo-formale dhe krimeve në fushën e doganës. Ky vlerësim është i rëndësishëm për Doganën e Kosovës, pasi që konfirmon rezultatet dhe qasjen strategjike, ndërsa që Dogana mbetet e përkushtuar për të adresuar të gjitha sfidat e procesit integrues, por duke pasur referencë kryesore efikasitetin në misionin dhe përgjegjësinë që ka Dogana kundrejt qytetarëve dhe ekonomisë së vendit”, thuhet në njoftim./teve1.info/
