Dokumentin e titulluar “drafti gjerman”, Qeveria e cilësoi si draft pa autor, teksa shtoi se çdo asociacion që ka karakter themeltar etninë, bie ndesh me kushtetutën.
E të premten u deklarua edhe presidentja Vjosa Osmani, e cila e quajti lajm të rremë ekzistencën e një dokumenti të tillë.
‘Nuk është e vërtet që ekziston një draft gjerman që i është dorëzuar institucioneve të Kosovës dhe as nuk do të ketë. Kjo për shkak se qëndrimi i partnereve tanë është i qartë dhe atë nuk thonë vetëm themelojeni Asociacionin, por edhe e pjesa e dytë e kërkesës është shumë me rëndësi, e përmendin që se asnjë veprim i tillë nuk duhet të jetë në kundërshtim me Kushtetutën”, u shpreh Osmani.
Duke folur për propozimin franko-gjerman, Osmani ka thënë se fuqitë e mëdha nuk kanë kërkuar asnjëherë të hiqet dorë nga njohja reciproke me Serbinë.
“Qëllimi i partnerëve tanë është qëllimi i mirë, që ky proces të përfundojë sa më parë dhe po ashtu që asnjëherë askush nga partnerët nuk ka kërkuar nga Kosova që të hiqet dorë nga njohja reciproke. Prandaj, dua t’i drejtohem qytetarëve të Kosovës, që të rrinë të qetë, sepse në asnjë mënyrë nuk do të lejojmë, jo që po kërkohet një gjë e tillë, por nuk do të lejojmë që të preket sovraniteti”, deklaroi Osmani.
E para e shtetit foli edhe për liberalizimin e vizave. Tha se ka marrë garanci që nuk do të ketë kritere shtesë, madje dha edhe një datë kur shpreson që të merret vendimi.
‘Është e domosdoshme që vendimmarrja politike të përfundojë gjatë Presidencës Çeke dhe po shpresojmë që vendimi merret më së largu deri në dhjetor dhe pastaj hyn në fuqi sipas praktikave të deritanishme që është deri në 6 muaj, e jo të lidhet me procesin e ETIAS që askush në Komisionin Evropian nuk e di se kur do të hyjë në fuqi”, shtoi Osmani.
Presidentja bëri të ditur se të hënën e javës së ardhshme do t’i takojë liderët shqiptarë nga Lugina e Preshevës.
Kronika e gazetarit Gojart Jashari.
