Në lidhje me këtë çështje, Teve1.info ka kontaktuar me Institutin gjerman, “Friedrich Ebert Stiftung”.
Nga ky Institut me zyre në Prishtinë, kanë thënë se janë duke punuar së bashku me Institutin Evropian për Paqe për këtë dokument.
Sipas tyre, dokumenti që është publikuar të enjten për Asociacionin është i vjetruar.
“Zyra e Fondacionit Friedrich-Ebert në Prishtinë aktualisht është duke punuar së bashku me Institutin Evropian për Paqe për këtë dokument. Megjithatë, dokumenti që u publikua dje është i vjetruar”, thuhet në përgjigjen e tyre për Teve1.info
Po ashtu, nga ky Institut kanë shtuar se së shpejti do të përfundojnë punën e tyre dhe do të bëjnë publik rezultatin.
“Shpresojmë të përfundojmë punën tonë së shpejti dhe do të jemi të lumtur ta bëjmë rezultatin në dispozicion të publikut atëherë”, kanë thënë nga Zyra e Fondacionit Friedrich-Ebert në Prishtinë.
Ndërkaq, Teve1.info dje i ka dërguar pyetje edhe Qeverisë gjermane për draft-statutin për Asociacionin, teksa kanë kthyer përgjigje se çështjet politike për normalizimin e plotë duhet të trajtohen në mënyrë vendimtare dhe të shpejtë që të mos ketë vend për përshkallëzim. Me tej theksuan se në takimet e fundit të nivelit të lartë propozimet për këtë qëllim janë diskutuar dhe ato po vazhdojnë. /Teve1.info/
