Imeri tha Shtete e Bashkuara të Amerikës kanë qenë shumë të rëndësishme në procesin e dialogut Kosovë – Serbi dhe se ardhja e Escobarit e krijon një lloj besueshmërie më të madhe për gjithë procesin.
Profesori universitar thotë se kjo vizitë ka për qëllim dinamizimin e procesit, për të pikëtuar çështjet të cilat duhet të zgjidhen shpejt dhe për ta dërguar gjithë këtë projekt drejtë përfundimit.
“Bashkimi Evropian nuk përfaqëson ndonjë institucion kredibil që do të mund të prodhojë një lloj marrëveshje të rëndësishme për palët e aq më tepër nuk do të jetë e gatshme për të qenë garantuesja e saj pa praninë e SHBA-së. Prandaj ardhja e tyre bëhet për këtë çështje, për të dinamizuar procesin, për të pikëtuar çështjet të cilat duhet të zgjidhen shpejt dhe për ta dërguar gjithë këtë projekt drejtë përfundimit sepse periudha kohore nga kur ka filluar dhe ku jemi tash është një energji e madhe, është një investim i madh”, tha Imeri.
Njohësi i çështjeve politike tutje në emisionin “Ditari” në Tëvë1 tha se Serbia është e interesuar të blejë kohë dhe ta përmbysë gjithë procesin.
“Kjo qasje i konvenon vetëm Serbisë sepse ajo është e interesuar që të marrë shumë kohë, që të tematizojë gjithçka, që të rinegociojë shumicën prej tyre, për energjinë, për targat, për të pagjeturit. Serbia nuk lejon zbatueshmërinë e marrëveshjes, ajo është e interesuar të blejë kohë, të destabilizojë rajonin dhe në këtë mënyrë të mund ta përmes gjithë procesin”, tha Imeri.
Escobar ka qëndruar të mërkurën për vizitë në Kosovë, me ç’rast është takuar me kryeministrin Albin Kurti, presidenten Vjosa Osmani dhe liderët opozitarë.
Ndërsa javën e ardhshme pritet të vijë në Kosovë edhe ndërmjetësi i dialout, Miroslav Lajçak./Teve1.info/
