Zëdhënësi i Komisionit Qendror të Zgjedhjeve, Valmir Elezi ka thënë për Tëvë1 se kjo zyre i ka renditur disa gjetje në raport me Ligjin për Zgjedhjet e Përgjithshme dhe Rregullën Zgjedhore 01/2013 për regjistrimin e partive politike.
Ai ka thënë se rekomandimi zyrës do të shqyrtohet në mbledhjet e ardhshme dhe KQZ-ja do të marrë vendimin.
“Zyra për Regjistrim të Partive Politike dhe Certifikim, ka monitoruar nga afër kuvendin e parë zgjedhor të partisë politike Guxo. Kjo Zyrë ka renditur disa gjetje në raport me Ligjin për Zgjedhjet e Përgjithshme dhe Rregullën Zgjedhore 01/2013 për regjistrimin dhe veprimin e partive politike. Rekomandimi i Zyrës do të shqyrtohet në njërën nga mbledhjent e radhës dhe KQZ-ja do të marrë vendimin meritor”, ka thënë Elezi.
Ndërkohë, Partia Guxo më 7 shtator e ka mbajtur kuvendin e parë zgjedhor dhe në këtë kuvend kjo parti ka zgjedhur dy kryetarë, Donika Gërvallën dhe Faton Pecin.
Partia Guxo duket se do të shkojë sërish në një kuvend të brendshëm zgjedhor për zgjedhjen e kryetarit të saj, kjo pasi që kuvendi i Partisë Guxo, dyshohet se ka përfunduar jashtë rregullave që përcaktohen në rregulloret e brendshme të KQZ-së, konkretisht të Zyrës për Regjistrimin dhe Certifikimin e Partive Politike.
