Njohësit e çështjeve politike nga vendet e rajonit që u janë hequr vizat tash e më shumë se një dekadë, e cilësojnë si të papranueshëm qëndrimin e BE-së, karshi Kosovës.
Gazetari Bledian Koka thotë se edhe kjo pengesë e vendosur për liberalizimin është e pakuptimtë.
“Për aq kohë sa pasaporta biometrike e Kosovës është e rregullt, i plotëson gati të gjitha të dhënat, mendoj që është e vështirë qoftë se koncensuesi, si me thënë gjithë dëshira e vendeve kryesore evropiane, për ta bërë këtë proces mund të shkoj përpara. Pra duhet parë deri ku do të shkoj qëndrimi i Francës dhe çfarë qëllimesh ka, megjithëse unë kam parë një lloj keqardhje që është shprehur gjatë këtyre ditëve nga ana e aktorëve të ndryshëm në Kosovë që e shohin qëndrimin e Francës si një pengesë të radhës që i bëhet Kosovës në mënyrë të pakuptimtë”, është shprehur Koka.
E njohësi i çështjeve politike nga Maqedonia e Veriut, Arben Ratkoceri, thotë se mund të ketë kushte të tjera politike për Kosovën.
“Realisht të paktën nëse është e vërtetë ky qëndrimi francez, paraqitet një çështje si pretekst një çështje teknike, e cila duhet të përfshij edhe vendet e tjera që e kanë liberalizimin, duke përfshirë edhe Maqedoninë e Veriut. Unë druaj që prapa saj mos fshihet, mos është e fshehur ndonjë kërkesë politike dhe çdo herë edhe në kontunuitet në fakt Kosovës shtyrjen e liberalizimit të vizës ja kanë ndërlidh me çështje teknike”, theksoi Retkoceri.
Vendet anëtare te BE-së do të vazhdojnë të zhvillojnë konsultime mes vete për liberalizimin e vizave për Kosovën. Takimi i radhës ku do të diskutohet kjo çështje pritet të mbahet më 9 nëntor.
Kronika e gazetarit Valmir Gallopeni.
