Në një përgjigje për Teve1.info nga presidenca çeke, kanë thënë se Komisioni Evropian ka prezantuar raportin e përditësuar për këtë temë, i cili rikonfirmon se Kosova i ka përmbushur kriteret për liberalizimin e vizave.
Po ashtu në njoftim thuhet se Grupi punues ka mbështetur procesin e liberalizimit të vizave dhe sipas tyre, për të ecur përpara me këtë, duhet të sqarohen një sërë temash.
“Më 13 tetor, Grupi Punues për Vizat e Këshillit të BE-së mbajti diskutimin e parë për liberalizimin e vizave me Kosovën nën Presidencën Çeke. Komisioni Evropian prezantoi raportin e përditësuar teknik për këtë temë, i cili rikonfirmon se Kosova vazhdon të përmbushë kriteret për liberalizimin e vizave. Grupi punues në përgjithësi përshëndeti rihapjen e diskutimit mbi këtë temë dhe në përgjithësi mbështeti procesin e liberalizimit të vizave. Për të ecur përpara në këtë dosje, do të jetë e nevojshme të sqarohen një sërë temash të lidhura dhe të vazhdohet me diskutimin”, kanë thënë nga presidenca çeke për Teve1.info
Të enjten gjatë ditës, u raportua se Franca ka vendosur përsëri kushte, duke propozuar që procesi i liberalizimit të vizave për Kosovën të lidhet me funksionalizimin e sistemit për siguri në Evropë, ETIAS. Këtë propozim e kanë mbështetur katër shtete tjera: Suedia Belgjika, Holanda dhe Spanja. /teve1.info/