Në mesin e temave që janë diskutuar në këto biseda, ka qenë edhe çështja e dialogut Kosovë – Serbi. Në bazë të njoftimeve zyrtare është bërë e ditur se Blinken ka kërkuar nga liderët përshpejtim të procesit të dialogut dhe arritje sa më të shpejtë të marrëveshjes finale.
Këtë angazhim të amerikanëve në procesin e dialogut, partitë opozitare në vend po e cilësojnë si mjaftë të rëndësishëm.
Enver Hoxhaj nga Partia Demokratike e Kosovës thotë se bashkësia ndërkombëtare po tregon se ka për qëllim përshpejtimin e procesit të dialogut.
“Mendoj që angazhimi amerikan dhe angazhimi gjerman e francez është një vendosmëri perëndimore për ta tejkaluar ngërçin në dialog. Dhe padyshim që dialogu ka hyrë në një fazë intensive dhe do të ketë takime të nivelit shumë të rëndësishëm, por është ende herët që ne ta dimë produktin final të asaj se çfarë mund të bisedohet në tavolinë dhe shumë më larg se sa ta dimë se çfarë mund të nënshkruhe”, tha Hoxhaj.
Ndërsa, Muhamet Hamiti nga Lidhja Demokratike e Kosovës thotë se qëndrimi amerikan që dialogu të përfundoj me njohje është jetik për këtë proces.
“Urgjenca e dialogut është e madhe, SHBA-ja kanë thënë më herët, vet Blinken se duhet të arrihet marrëveshje e gjithëmbarshme me njohje në qendër sic po thuhet … nga ajo që pam mbrëm prej cicërimave të kryeministrit tonë, të Blinkenit, por edhe në anën tjetër edhe të presidentit të Serbisë, ne nuk mund të dijmë se cili ka qenë qëndrimi tamam, por intensifikimi është i domosdoshëm dhe njohja reciproke është jetike për normalizim të marrëdhënieve”, deklaroi Hamiti.
Kërkesën për një përfundim sa më të shpejtë të dialogut, presidenti amerikan Joe Biden dhe Sekretari Antony Blinken e kanë bërë edhe me letrat që i kanë dërguar në fillim të vitit, Kurtit e Vuciqit.
Kronika e gazetarit Valmir Gallopeni.
