Ky manastir që është ndërtuar në shekullin e 15-të është në listën e monumenteve të mbrojtura nga UNESCO.
Por, krahas bukurisë e vlerës kulturore të këtij objekti ka vite që diskutohet edhe për një çështje tjetër, pronësinë e 24 hektarëve për rreth këtij manastiri.
Ndonëse ka një vendim të Gjykatës Kushtetuese në vitin 2016, i cili i jep në pronësi këta hektarë Manastirit, kjo po kontestohet nga autoritetet lokale në Deçan e nga ekzekutivi në Prishtinë.
Kryeministri Kurti, vazhdimisht ka theksuar se vendimi i Gjykatës Kushtetuese të Kosovës, për t’i detyruar autoritetet lokale të Deçanit që t’ia kthejnë Manastirit të Deçanit 24 hektarë tokë dhe pyje, është i bazuar në “politikën diskriminuese” të Qeverisë së Serbisë, të vitit 1997.
Madje pikërisht për këtë çështje Kurti ka kërkuar një takim me përfaqësuesit e këtij manastiri.
“Neve kemi një vendim të Gjykatës Kushtetuese dhe disa vendime administrative për këto prona. Unë besoj se kjo çështje do të zgjidhet, mirëpo është me rëndësi që të kemi edhe dialog ndërmjet Qeverisë së Kosovës dhe autoriteteve fetare në Manastirin e Deçanit. Unë jam kryeministri i parë i Republikës i cili nuk pranohet në takim me priftërinjtë ortodoksë”, tha Kurti.
Mirëpo nga Manastiri i Deçanit kanë theksuar edhe një here se çështja e pronësisë është tashmë e kryer.
“Dioqeza ortodokse serbe në Kosovë ka qenë gjithmonë e hapur për dialog me institucionet e Kosovës, por jo për ligjshmërinë e vendimit të Gjykatës Kushtetuese të Kosovës të vitit 2016, i cili konfirmoi pronësinë e Manastirit të Deçanit mbi 24 hektarë. Ky është një qëndrim i vendosur i ambasadorëve të BE-së, OSBE-së dhe shteteve të Quint-it”, thuhet në qëndrimin e Manastirit.
Por njohësi i Kushtetutës, Mazllum Baraliu, e quan vendimin e Kushtetutës diskriminues e pa bazë ligjore.
Madje sipas Baraliut ky vendim nuk mund të ekzekutohet nga asnjë qeveri.
Për zbatimin e këtij vendim të Kushtetueses vazhdimi ka pasur thirrje nga ambasadorët e BE-së dhe SHBA-së të akredituar në Kosovë.
Kronika e gazetares Doresa Geci.