Një ditë pas dorëheqjes nga posti i ministrit të shëndetësisë, Rifat Latifi është personi më i përfolur. Për dorëheqjen e tij, kanë folur edhe partitë opozitare. Teksa këtë post po e kërkojnë deputetët e partisë Guxo.
Për këto 24 orë, Rifat Latifi është ministri më i përfolur.
E dorëheqja e tij vazhdoi të diskutohet edhe gjatë së premtes.
Deputeti nga radhët e Partisë Demokratike të Kosovës, Bekim Haxhiu thotë se sektori i shëndetësisë ishte arsyeja e përplasjeve politike brenda partisë në pushtet.
Sipas Haxhiut, nuk ka pasur koordinim në mes ish ministrit Latifi dhe ekzekutivit.
Ndërkaq ish-ministri i Shëndetësisë, Armend Zemaj thotë se kjo dorëheqje ka ardhur pasi Kurti ka ndërhyrë në sektorin e shëndetësisë.
“Kanë kaluar 18 muaj ku tre ministri përfshirë edhe Kurtin kanë udhëhequr Ministrinë. Shprehim shqetësimin për situatën në sektorin e shëndetësisë. Është e vërtetuar se paaftësia qeverisëse mbetet kryefjalë. Dorëheqja e Latifit vije si dështim i Kurtit si kryeministër. Është shumë e padrejtë ndërhyrjet në sektorin e shëndetësisë në përzgjedhjen e drejtorëve të klinikave”, ka thënë Zemaj.
E pas dorëheqjes së Latifit, postin e tij po e kërkojnë deputetët e partisë “Guxo”.
Sipas deputetit të kësaj partie, Burim Meta, nuk ka emra të përveçëm mirëpo ka persona të përgatitur për këtë pozitë.
Ish-ministri i shëndetësisë, Rifat Latifi dha dorëheqje të enjten nga posti i ministrit të shëndetësisë, ende pa i bërë një vit pune.
