Në komunikatën e OHTK-së thuhet se Kryetarët e Njësive Rajonale janë shprehur shumë të shqetësuar për gjendjen aktuale me të cilën po përballen bizneset e sidomos me ngritjen e çmimeve, përcjellë teve1.info.
“Kryetarët e Njësive Rajonale janë shprehur shumë të shqetësuar për gjendjen aktuale me të cilën po përballen bizneset e sidomos me ngritjen e çmimeve duke e argumentuar këtë me faktin se nga janari kosto e mallit është ngritur 42% e duke ia shtuar kësaj edhe problemet me të cilat bizneset do të ballafaqohen gjatë dimrit për shkak të paralajmërimeve për krizë energjetike”, thuhet në njoftim.
Pasi që Qeveria e Kosovës ka paralajmëruar që na pret një dimër i vështirë, OHTK ka kërkuar që të gjendet mënyra që këto biznese të ndihmohen pasi që sipas tyre së paku 30 për qind nga to rrezikojnë të mbyllen.
“Qeveria në vend që të marrë vendime që e rëndojnë edhe më shumë gjendjen e bizneseve, duhet që së bashku me OHTK-në dhe Odat tjera të gjejë mënyra për përkrahjen e tyre që të mbijetojnë”, thuhet tutje në komunikatën për media.
