Përfaqësuesit e 27 vendeve anëtare të Bashkimit Evropian dhe liderët e 17 vendeve jo-anëtare, do të takohen më 6 tetor në Pragë të Çekisë, me ftesë të presidentit të Këshillit Evropian, Charles Michel, në kuadër të takimit të parë të Komunitetit Politik Evropian, që është propozim i presidentit francez, Emmanuel Macron.
Në ftesën që Michel u dërgoi të 44 vendeve të kontinentit evropian, ka cekur edhe qëllimin e këtij takimi.
“Ambicia është të bashkojë liderët në baza të barabarta dhe të nxisë dialogun politik dhe bashkëpunimin për çështje me interes të përbashkët, në mënyrë që, së bashku, të punojmë në forcimin e sigurisë, stabilitetit dhe prosperitetit të Evropës në tërësi”.
Në këtë takim Republika e Kosovës do të përfaqësohet nga presidentja e vendit, Vjosa Osmani. Këtë gjë për tëvë1 e ka konfirmuar, Bekim Kupina, Këshilltar për Media i Presidentes.
E profesori universitar, Arben Fetoshi, thotë se është detyrë e presidentes që ta përfaqësoi vendin në organizime të këtij formati.
“Duke pasur parasysh që bëhet fjalë për takimin e parë inaugurues të kësaj ideje, natyrisht që vendi ynë duhet të përfaqësohet nga presidentja, e cila e ka detyrë kushtetuese përfaqësimin e vendit në marrëdhënie ndërkombëtare, për shkak se siç thash jam i bindur që platforma edhe për një kohë do të ngelet në nivelin e diskutimeve politike do të jetë thjeshtë e formatit përfaqësues dhe jo më tepër”, deklaroi Fetoshi.
Në agjendën që është publikuar në faqen e Këshillit të Bashkimit Evropian, thuhet se kjo platformë për koordinim politik nuk zëvendëson asnjë organizatë, strukturë apo proces ekzistues dhe nuk synon të krijojë të reja në këtë fazë. Përderisa thuhet se temat që do të diskutohen janë paqja dhe siguria, situata ekonomike, energjia dhe klima, si dhe migrimi dhe lëvizshmëria.
Kronika e gazetarit Valmir Gallopeni.
