Gjatë fjalës së saj, Haxhiu deklaroi se nga zyrtarët e MD-së i është thënë se kamerat e sigurisë në ditën kritike janë marrë para policisë, me udhër të ish-ministres së Drejtësisë, Dhurata Hoxha.
Sipas saj, Prokuroria Speciale e cila e ka në dorë rastin duhet të hetojë më shumë rreth shkeljeve që kanë bërë personat përgjegjës atë ditë dhe të hetohet përfshirja e ish-ministres Hoxha.
“Sa i përket çështjes së epilogut në raport me procesin juridik për zbardhjen e rastit Dehari më lejoni t’ju njoftoj që ky rast aktualisht është duke u trajtuar nga Prokuroria Speciale pas disa informacione që kemi pranuar kam urdhëruar një inspektim në raport me atë se cilat kanë qenë përgjegjësitë e personave përgjegjës dhe se a janë kryer detyrat e personave përgjegjës në përputhje me legjislacionin dhe në përputhje me kompetencat”, tha Haxhiu.
Madje, ajo thotë se gjetjet tregojnë se atë ditë kamerat janë marre para policisë edhe kjo është shkelje penale.
“Ka pasur shkelje nga personat përgjegjës që kanë qenë në detyrë atë ditë. Gjetjet tregojnë se atë ditë kamerat janë marre para policisë edhe kjo është shkelje penale po ashtu kamerat kanë mundur që nga zyrtarët përgjegjës të shihen pasi që ato të merren nga policia por jo të merren. Sipas informacioneve që kam marrë dhe kjo duhet të dëshmohet në prokurori. Mirëpo, nga zyrtarët të MD-së më është thënë se kjo është bërë me urdhër të Dhurata Hoxhës, ish-ministres së Drejtësisë”, ka thënë Haxhiu.
