Shefi i Grupit Parlamentar të Aleancës për Ardhmërinë e Kosovës, Besnik Tahiri i ka bërë thirrje Qeverisë që t’i plotësojë kushtet e grevistëve në sistemin arsimor.
Përmes një postimi në Facebook, ai thotë se qytetarët e vendit nuk kanë marrë asnjëherë goditje më të rëndë që lidhet me bllokimin e procesit mësimor.
“Për më shumë se një vit e gjysmë qeverisje, qytetarët e Kosovës nuk kanë marrë goditje më të rëndë se kjo që lidhet me bllokimin e procesit mësimor, tash e një muaj. Nuk ka papërgjegjësi më të madhe se sa një temë që lidhet me tërë një popull, e të trajtohet me këtë indiferencë. Takimet dhe dialogu me grevistët nisën vetëm atëherë kur u thellua problemi. Ndërsa, zgjidhja është reduktuar në një masë monetare”, shkroi ndër tjerash ai.
Tutje, deputeti opozitar ka kërkuar nga Qeveria që të nisë mësimi dhe të ndalen talljet me popullin e Kosovës.
“Në fakt dialogu u konceptua si farsë dhe tallje. Kjo duhet të marrë fund. Sot, jo më larg se sot, Qeveria duhet t’i plotësojë kushtet e grevistëve, të nisë mësimi dhe të mos bëhet hajgare me një popull”, thuhet në postim./teve1.info/
