Ajo ka thënë se kjo sindikatë përveç që po refuzon bashkëpunimin me Qeverinë ka refuzuar edhe rolin e Presidentes dhe Avokatit të Popullit.
“Si Qeveri kemi pritur që të ketë gatishmëri edhe nga SBASHK-u dhe të vazhdojmë dialogun social e të fillojë mësimi. Por, përmes mediave kemi parë tashmë që Sindikata ka dalë me qëndrim se greva vazhdon. Fatkeqësisht, Sindikata e Arsimit përveçse po refuzon bashkëpunimin me Qeverinë, ka dështuar dhe refuzuar edhe rolin ndërmjetësues të Presidentes e tash së fundi edhe të Avokatit të Popullit.SBASHKU tanimë po e dëshmon se grevën nga një instrument e ka shndërruar në objektiv në vete. Si e tillë, greva e ka humbur çdo kuptim andaj, si ministre e Arsimit ftoj mësimdhënësit anembanë Kosovës që, nga nesër t’u kthehen shkollave”, ka shkruar ajo në Facebook.
Nagavci ka njoftuar se të shtunën bashkë me zv.KM, Besnik Bislimi dhe ministrin e Financave, Punës dhe Transfereve, Hekuran Murati janë takuar me Avokatin e Popullit.
Ajo ka njoftuar se kanë pranuar një letër nga Avokati i Popullit, Naim Qelaj të cilën e kanë shqyrtuar dhe menjëherë i kanë kthyer përgjigje duke adresuar propozimet e tij.
Në përgjigjen ndaj letrës së Avokatit të Popullit,thuhet se “Qeveria e Kosovës, në fund të vitit 2022, do ta rivlerësojë situatën e krijuar dhe në akordim me konkluzionet e nxjerra do të vendoset për periudhën e re të ofrimit të shtesave mbi pagë, nivelin e shtesës dhe kategoritë shoqërore të mbuluara”.
Ndryshe , SBASHK-u përmes një komunikate për medie ka thënë se as takimet me Avokatin e Popullit nuk kanë sjellë rezultat duke njoftuar se greva në arsim vazhdon./teve1.info/
