Kurti ka thënë se projektligji për pagat do të dalë në dëgjim publik në këtë javë, raporton Teve1.info
“Projektligji për pagat do të dalë në dëgjim publik në këtë javë. Në këtë javë lëshon zyrat e qeverisë dhe vihet në diskutim publik”, tha ai.
Kurti thotë se kryesisë së Këshillit Grevist ia kanë paraqitur tri oferta, mirëpo ata këmbëngulin në greva.
“Kërkojë që nxënësit të shkojnë në shkolla dhe mësimdhënësit, të parët të mësojnë e të dytit të japin mësim. Nuk bën bojkot. Ne ua thamë edhe tri gjëra përfaqësuesve të Këshillit Grevist. Në takim na u tha se për këtë gjë do ta pyesin edhe anëtarësinë. Por sa dolën nga takimi deklaruan për media që greva vazhdon, kur e pyetën anëtarësinë këta”, deklaroi ai.
Shefi i ekzekutivit të Qeverisë tregon ofertën shtesë që ua ofroi BSPK-së.
“Oferta shtesë ishte kjo, do të jenë pjesë përmbajtësore e diskutimeve për ligjin mbi pagat. Ne atyre ua dhamë lajmin se këtë javë do të fillojë diskutimi publik sepse ato po përfundojnë. Dy të tjerat ishin që bashkërisht me BSPK-në do ta bëjmë reformën e sistemit pensional, në mënyrë që të bëjmë diferencimin e kategorive të ndryshme, duke e hequr atë pragun famëkeq për 15 vjet përvojë pune dhe për këtë u zotuam sot. Tjetra u zotuam që te barnat esenciale do të shtojmë edhe 10 milionë euro. Ata thanë që do të konsultohen për këto gjëra me anëtarësinë, kur dolën pas takimit thanë që vazhdon greva. Nuk kam se si i kuptoj ndryshe këta”, theksoi Kurti.
Më tej, Kurti thotë se ka kaluar koha kur kryeministri u ndihmon të tjerëve si vëlla.
“Më thoshin na ndihmo si vëlla, si vëlla të ndihmojë privatisht, por unë jam kryeministër dhe ka kaluar koha kur kryeministri të ndihmon si vëlla. Nuk bën pazare kryeministri”, tha ai. /teve1.info/
