Tutje, ai përmendi edhe ngecjen në negociata mes Prishtinës e Beogradit, teksa e cilësoi si dialog të sinqertë që duhet të vazhdojë tutje.
“Temë diskutimi do jetë edhe liberalizimi i vizave për plotësimin e premtimeve. Gjithashtu do jetë temë e bisedave edhe kriza energjetike gjatë dimrit, nëse ne do arrijmë një marrëveshje të përbashkët, do t’i dërgojmë mesazh Brukselit që të mos harrohen shtetet e Ballkanit Perëndimor. Si një problem kryesor në rajon është përmendur ngecja në negociata mes Prishtinës dhe Beogradit, mirëpo unë jam i gëzuar për një rezultat të pjesshëm të takimit të fundit në Bruksel që një dialog i sinqertë të vazhdojë tutje”, shtoi Pahor.
Ndërkaq, ai po ashtu bëri thirrje që të gjithë drejtuesit në rajon t’i anashkalojnë deklaratat dhe sjelljet që prishin shkallën e besimit për të arritur zgjidhje konstruktive.
“Të hënën në Slloveni siç po ju them juve, do them edhe atje se gjendja po prishet e keqësohet dhe shkalla e besueshmërisë mes drejtuesve në rajon, është në ulje e sipër. Vështirësimet energjetike më brengosin. Ne duhet të jemi të vetëdijshëm që drejtuesit në këtë rajon, jemi të detyruar të bëjmë gjithçka që është e mundur t’i anashkalojmë deklaratat e sjelljet që prishin shkallën e besimit dhe ulin mundësinë që të gjejmë një zgjidhje konstruktive. Nuk bëhet fjalë vetëm për problemin mes Beogradit e Prishtinës por edhe për probleme tjera”, deklaroi ai.
