Qytetarët e Kosovës dhe Serbisë vetëm me letërnjoftim po hyjnë e po dalin pa problem nëpër pikat kufitare.
Në Jarinje gjatë së enjtes qarkullimi ka vazhduar normalisht duke u respektuar marrëveshja për letërnjoftimet.
Gjithashtu edhe në pikën kufitare në Bërnjak, qarkullimi ka vazhduar normalisht, në përputhje me marrëveshjen.
Pa përmendur raportet politike qytetarët serbë shprehen të kënaqur me marrëveshjen për qarkullim.
“Kjo marrëveshje është e njëjtë për të gjithë pa marrë parasysh letërnjoftimet targat është e njëjtë edhe për ne edhe për shqiptarët”, tha një qytetar.
“Kjo marrëveshje është e shkelqyeshm”, tha një tjetër.
Megjithatë ka nga ata që ujdia e fundit nuk iu bënë përshtypje.
“Nuk dua ta jap asnjë mendim për këtë çështje…”, tha një tjetër qytetar.
Situata në këto pika kufitare për dallim nga 31 korriku ishte e qetë. Gjithçka kontrollohej nga Policia e Kosovës. E në mëngjes madje këtu u pa edhe një ekip i EULEX-it.
Ndryshe në hyrje të kufirit në të gjitha pikat Serbia ka vendosur tabela të informimit. Aty shkruhet se letërnjoftimet e Kosovës pranohen vetëm për çështje praktike dhe kjo nuk nënkupton që Serbia e njeh Kosovës si shtet.
Raporti i gazetares Doresa Geci.
