Qytetari Milan Joksimoviq thotë se marrëveshja për dokumentet është e mirë për qarkullimin e lirë të njerëzve.
“Mendoj se është e mirë. Populli të qarkullojë i lirë, çfarë tjetër”, thotë ai.
Edhe qytetari tjetër Dejan Niçiq theksoi se sjellja e policëve zyrtarë ishte e shkëlqyeshme nga pala kosovare.
“Gjithçka është mirë, nuk kam çka të them tjetër… Gjithçka është në rregull, super.. Është mirë për të gjithë ne të lëvizim normalisht. Nuk kam tjetër çfarë të shtoj”, thotë ai.
Në pikën kufitare në Merdare, në mesnatë nisi zbatimi i marrëveshjes Kosovë-Serbi për dokumentet e udhëtimit hyrje-dalje për shtetasit e të dy vendeve.
Ushtruesi i komandantit të stacionit policor në Podujevë, Togeri Fehat Gashi ka thënë se marrëveshja për dokumentet është duke u zbatuar 100 për qind. Sipas tij pala serbe dhe ajo kosovare nuk kanë lëshuar dokumente shtesë të udhëtimit.
Ujdia në distancë mes Kosovës dhe Serbisë është arritur të shtunën e kaluar.
Ndryshe vendim për reciprocitet ishte marrë në mbledhjen e 29 qershorit nga Qeveria e Kosovës dhe ishte planifikuar të fillojë së zbatuari më 1 gusht, por për shkak të tensioneve në veri vendimi ishte shtyrë për një muaj.
