Qeveria e Republikës së Kosovës me anë të vendimit të muajit qershor, synon të ndalojë nga qarkullimi targat e makinave që janë të lëshuara nga Beogradi.
Kjo ishte njëra nga çështjet që nxiti tensione në komunat veriore të vendit në fillim të muajit gusht.
Pas arritjes së marrëveshjes për letërnjoftimet, nga Bashkimi Evropian nuk fshehin optimizmin se në të ardhmen e afërt mund të ketë edhe një marrëveshje për targat.
Në anën tjetër, presidenti i Serbisë, Aleksandër Vuçiq, tha se gjasat janë zero që marrëveshja të arrihet para 1 shtatorit.
Ndërsa, i dërguari special i Bashkimit Evropian për dialogun, Miroslav Lajçak në një intervistë dhënë për Euronews Serbia, ka thënë se kanë edhe dy muaj kohë për arritjen e një marrëveshje për targat.
“Vendimi i Qeverisë në Kosovë është që procesi të përfundojë deri në fund të tetorit. Pra kemi dy muaj për të gjetur një zgjidhje. Tashmë jemi në atë proces. Ajo fushatë regjistrimi fillon më 1 shtator dhe duhet të zgjasë dy muaj. Nuk pres ndonjë dramë më 1 shtator. Nuk ka arsye për këtë, ne kemi atë periudhë dy mujore për të gjetur një zgjidhje, siç e kemi gjetur në lidhje me te kartat e identitetit”, tha ai.
Përveç BE-së edhe nga SHBA kanë deklaruar se kanë marrë premtime nga Kosova dhe Serbia se nuk do të ketë tensione më 1 shtator.
Por, njohësi i çështjeve të sigurisë, Drizan Shala, thotë se strukturat kriminale serbe në veri te vendit mund të inskenojnë ndonjë situatë.
Qytetarët serbë që jetojnë në Kosovë kanë afat që deri më 30 tetor t’i zëvendësojnë targat e lëshuara nga Serbia, me ato të Republikës së Kosovës.
Kronika e gazetarit Valmir Gallopeni.