Kreu i ekzekutivit pas takimit tha se është interes i tij ta informoj opozitën për zhvillimet në dialog, sidomos në kohën kur Kuvendi është në pushim.
Duke folur rreth një marrëveshje potenciale për targat, Kurti tha se ajo që dihet është se deri më 31 tetor vazhdon konvertimi i targave ilegale në legale.
‘Sa i përket 1 shtatorit, vazhdon fushata për konvertimin e targave nga ato që i ka lënë regjimi i Millosheviqit, e Serbia e secilit pushteti i ka vazhduar, tek ato që janë legale dhe legjitime të Republikës së Kosovës. Dhe kjo do të vazhdojë deri më datën 31 tetor”, deklaroi Kurti.
Ndërsa për dokumentet tha se kalimi i kufirit nga 1 shtatori do të duhet të bëhej vetëm me letërnjoftim, përveçse nëse Serbia vepron ndryshe.
“Nëse teorikisht e rastësisht Serbia vazhdon të lëshojë dokumente të tilla, atëherë do të detyrohemi edhe ne në bazë të parimit të reciprocitetit, si parim i marrëdhënieve të shëndosha fqinjësore, ta vendosim edhe ne dokumentin e hyrje-daljes”, shtoi ai.
E kryetari i LDK-së, Lumir Abdixhiku tha se dialogu për çështje të veçanta i shërben vetëm Serbisë teksa tregoi çfarë i kërkuan shefit të ekzekutivit.
“Prandaj i kërkuam kryeministrit që të jetë i guximshëm, të shkojë në dialog së bashku me aleatët tanë në veçanti ShBA-në, të kërkojë marrëveshjen finale, me njohje reciproke në thelb të saj e me respektim të kushtetutës”, u shpreh Abdixhiku.
Kurse i pari i AAK-së, Ramush Haradinaj propozoi që tashmë është koha që frenat e dialogut t’ia marrë BE-së një fuqi tjetër.
“Rrethanat politike, gjeostrategjike tashmë kanë ndryshu. Bashkimi Evropian nuk është më neutral, është në luftë me Rusinë, pra njëjtë si gjithë bota. Unë mendoj që tash është koha që edhe Kurti me kërku zyrtarisht që portofolin e dialogut me kalu te z.Biden”, tha Abdixhiku.
Në këtë takim nuk ishte kreu i PDK-së, Memli Krasniqi. Meqë kjo parti ka refuzuar ftesën e kryeministrit.
Ndërsa me fillimin e sesionit vjeshtor të Kuvendit, Kurti pritet që për dialogun t’i raportojë edhe deputetëve.
Kronika e gazetarit Gojart Jashari.