Mallin për opozitën kryeministri Kurti, pret që ta shuaj gjatë ditës së martë.
Ai zyrtarisht i ka dërguar ftesë për takim, kryetari të PDK-së Memli Krasniqit, atij të LDK-së, Lumir Abdixhikut si dhe kreut të AAK-së, Ramush Haradinaj.
Këtë e ka konfirmuar edhe zëdhënësi i Qeverisë së Kosovës, Përparim Kryeziu.
“Dje u janë dërguar ftesat në formë elektronike, ndërsa sot dërgohen në formë fizike. Ftesa për takim është për ditën e nesërme”, tha Kryeziu.
Kurti më parë ka njoftuar se me opozitën do të diskutoj për takimin e fundit që pati në Bruksel në kuadër të dialogut me Serbinë.
I pari që iu përgjigj pozitivisht ftesës, ishte lideri i AAK-së Ramush Haradinaj.
“Për mua dhe Aleancën, çështja e dialogut për njohje, gjithmonë ka qenë çështje mbipartiake. Këtë përcaktim e kam pasur edhe gjatë kohës sa e kam udhëhequr qeverinë e vendit. Gjithmonë kam konsideruar se për tema të interesit nacional, nuk ka qeveri dhe opozitë. Të gjithë e kanë pjesën dhe rolin e tyre”, thuhet në përgjigjen e Haradinaj.
Kurse pasdite Lidhja Demokratike e Kosovës mblodhi kryesinë.
E pas përfundimit të takimit, kreu i partisë, Lumir Abdixhiku njoftoi që ka pranuar ftesën e kryeministrit Kurti
“Ftesa e Kurtit vjen me vonesë, por meqë besoj se çështjet kombëtare duhet të jenë mbi politikën ditore, do ta pranoj këtë ftesë. Kam pritur një proces më transparent dhe më gjithëpërfshirës rreth procesit të dialogut. Deri më tani, informimin e vetëm dhe të detajuar, LDK e ka pranuar vetëm nga aleatët ndërkombëtarë – të cilët në vazhdimësi i kanë qëndruar Kosovës në krah”, ka shkruar ai.
Ndërkohë Partia Demokratike e Kosovës e ka refuzuar ftesën. Kryetari i kësaj partie, i ka kthyer përgjigje me shkrim kryeministrit Albin Kurti.
“Aktualisht, e tëra që po shohim është se dialogu ka rrëshqitur në nivel teknik, duke përfshirë riciklimin e marrëveshjeve të kaluara. Sa i takon zbatimit të përgjegjësive që keni si udhëheqës i Dialogut, unë ju inkurajoj që të vazhdoni angazhimin tuaj dhe te qeverisë për respektim të vendimeve të ligjshme që sigurojnë reciprocitet në raport me Serbinë, si dhe sundim të ligjit dhe lëvizje të lirë në gjithë territorin e Republikës së Kosovës. Por, nuk konsideroj se në këtë moment ka një situatë emergjente për t’u takuar e për të diskutuar për këto përgjegjësi tuajat. Megjithatë, unë mbetem i hapur dhe i gatshëm që të takohem me ju në momentin kur të ketë avancim të procesit të Dialogut dhe diskutim konkret për arritjen e marrëveshjes finale, që ka për qëllim njohjen e ndërsjellë”, ka thënë kreu i PDK-së, Memli Krasniqi.
E njohësi i çështjeve politike Melazim Koci, thotë se opozita duhet të shkojë në takim dhe të flas për atë se çfarë duhet të diskutohet në dialog.
“Kryeministri Kurti ka bërë mirë që e ka ftuar opozitën në takim, do të kishte bërë më mirë t’i kishte ftuar më herët, para bisedimeve, do të thotë takimeve me Vuciqin, por tani kjo është e kaluar. Unë shpresoj dhe besoj që opozita do të pranojë ftesën e zotëri Kurti dhe do të takohen, mendoj se në ato takime ose në atë takim temë qendrore duhet të jetë kjo, çfarë është prioritare në këtë moment në bisedimet Kosovë – Serbi? Është statusi apo çështjet parciale?Unë mendoj që esenciale në tryezën e bisedimeve të shtrohet çështja e statusit”, tha Koci.
Që nga fillimi i procesit të dialogut, të gjitha qeveritë e deritashme janë përballur me mungesën e një konsensusi të brendshëm politik, pavarësisht deklaratave se dialogu me Serbinë tejkalon interesat partiake.
Kronika e gazetarit Valmir Gallopeni.
