Kjo pasi sipas tij të gjitha kërkesat e SBAShK-ut janë adresuar në Ligjin e ri për Paga.
“Nëse e shihni në raport me atë Ligjin e kaluar, të cilin e pat anuluar Gjykata Kushtetuese, ne kemi faktikisht ngritje të koeficienteve për të gjitha kategoritë e mësimdhënësve dhe përmirësim të atyre përpjesëtimeve në mes të pagës së një mësimdhënësi dhe pagës më të madhe në Kosovë, që ka qenë një problem me rastin e Projektligjit të kaluar, dhe kjo vlen edhe për stafin tjetër të shkollave. Ndërsa, për sa i përket grevës, ne jemi deklaruar edhe më herët se veprimet për ndërprerjen e procesit mësimor nuk kanë arsyetim”, ka thënë Pupovci.
Pupovci po ashtu ka deklaruar se MASHTI i ka bërë të gjitha përgatitjet teknike për fillimin e vitit të ri shkollor më 1 shtator.
“Po, mund të konfirmoj se janë bërë të gjitha përgatitjet e nevojshme për fillimin e procesit mësimor. Është duke u bërë edhe shpërndarja e teksteve shkollore dhe çdo gjë është gati që mësimi të fillojë më datë 1 shtator”, tha ai.
Në anën tjetër, Sindikata e Arsimit ka insistuar se greva nuk do të ndalet deri në realizimin e kërkesave të tyre.
