Në këtë proces pritet të marrin pjesë edhe mësimdhënësit që janë pjesë e grevës e cila ka filluar të mërkurën.
Kryetari i Sindikatës se Arsimit, Rrahman Jasharaj, tha se përkundër grevës, të gjithë mësimdhënësit do t’i përgjigjen ftesës së Drejtorive Komunale të Arsimit për të qenë pjesë e këtij testimi.
“Mësimdhënësit në komunikim që do të kenë me Drejtoritë Komunale të Arsimit do të gjejnë një zgjidhje për mbarëvajtjen e testit të Maturës. Dhe unë jam optimist që Sindikata e Arsimit do sjellë edhe vendim që të shtunën të mbahet testi i Maturës dhe mësimdhënësit që janë caktuar në administrim, të angazhohen dhe të jenë pjesë e këtij procesi”, tha Jasharaj.
Kurse ministrja e Arsimit, Arbërie Nagavci, para disa ditëve deklaroi në konferencë për medie se ky institucion i ka bërë të gjitha përgatitjet për procesin e testit të maturës.
“Në këtë afat të provimit të Maturës Shtetërore pritet t’i nënshtrohen rreth 5 mijë nxënës në komuna të ndryshme. Ne si ministri kemi marrë të gjitha masat për sa i përket përgatitjeve për mbarëvajtjen e provimit të dytë të maturës dhe kërkojmë që ky proces të zhvillohet normalisht dhe as kush mos t’i diskriminojë këta nxënës”, tha Nagavci.
Në testin e dytë të provimit të Maturës Shtetërore, maturantët pritet t’i nënshtrohen testit në 65 qendra, ku do të përgjigjen në 100 pyetje./RTK/