Para nisjes për Beograd, dy emisarët e dialogut Kosovë-Serbi vizituan veriun e Kosovës.
Të enjten, i dërguari i Shteteve të Bashkuara të Amerikës, Gabriel Escobar dhe homologu i tij nga Bashkimi Evropian, Miroslav Lajçak takuan përfaqësuesit e Listës Serbe.
Edhe kësaj radhe, takimi i tyre me krerët serb u zhvillua me dyer të mbyllura për media.
Pas takimit, i dërguari i SHBA-së, Escobar tha se do të dalin me deklarata pas përfundimit të takimit edhe në Beograd.
“I dëgjuam shqetësimet e kryetarëve të komunave dhe tash duhet të vazhdojmë për në Beograd dhe shpresoj se nga Beogradi, sonte apo nesër do të bëjmë deklaratë”, tha Escobar.
Në anën tjetër, emisari i BE-së, Miroslav Lajçak përsëriti se 1 shtatori do të jetë ditë normale.
Sipas tij, ka disa opsione që po diskutohen në mes dy palëve, për të cilat nuk mund të flasë në detaje.
“Nuk dua të flas për opsionet që janë në tavolinë. Nuk ka të bëj me fitues e humbës, ka të bëj me opsione në të mirë të njerëzve. Bashkë me kolegët amerikanë po punojmë në të mirën e njerëzve, që të mos ketë barrikada”, tha Lajçak.
Ai foli edhe për mundësinë e një takimi tjetër mes dy palëve.
“Mendoj se do të organizohet së shpejti, ata janë pajtuar që të takohen, mendoj njëherë në muaj, ngase ka shumë çështje që duhet të diskutojnë dhe kështu ishte marrëveshja”, shtoi ai.
E disa minuta më shumë brenda qëndroi Ambasadori Amerikan, Jeffry Hovenier.
E detaje nga takimi nuk dhanë krerët e Listës Serbe.
Ndryshe, Lajçak e Escobar gjatë së mërkurës takuan shefen e shtetit, Vjosa Osmani, shefin e ekzekutivit Albin Kurti dhe krerët e partive opozitare të vendit.
Kronika e gazetares Fetije Kamberi.