Përmes një njoftimi në Facebook, nga MASHT-i kanë bërë të ditur se në takim është bashkëbiseduar për çështje të ndryshme në arsim, përfshirë fillimin e vitit të ri shkollor.
Nagavci njoftoi se MASHTI i ka bërë të gjitha përgatitjet për fillimin e vitit të ri shkollor.
“Ministrja foli edhe për projektligjin për paga, i cili është në diskutim paraprak, angazhimin e asistentëve për fëmijët me nevoja të veçanta, ndarjen e buxhetit për mësimdhënësit me probleme shëndetësore dhe çështje të tjera të rëndësishme, si dhe veprimet të cilat janë ndërmarrë për përmirësimin e gjendjes në arsim”, thuhet në njoftim.
Sipas MASHT-it, Nagavci i informoi mësimdhënësit për përmirësimin e infrastrukturës ligjore, përfshirë këtu Ligjin për tekste shkollore, Ligjin për AKA, Ligjin për arsimin e lartë dhe disa ligje tjera.
“Ndër të tjera, u diskutua edhe për përmirësimin e infrastrukturës në shkolla dhe pajisjen e tyre me kabinete, laboratore e salla sportive”, thuhet në njoftim. /teve1.info/
