Përmes një komunikate, kreu i BSPK-së, Atdhe Hykolli ka deklaruar se Qeveria po kërcënon grevistët dhe se kjo është antiligjore.
“Partneri ynë Social – Qeveria po kërcënon grevistët dhe kjo është antiligjore se shkelet ligji për grevat, LIGJI Nr. 03/L-200, Neni 11, 13 dhe 18, e mbi të gjitha kjo nuk është aspak e mirë. Të kërcënosh grevistët e qetë dhe në të drejtën e tyre është shkelje e normës dhe parimeve të shtetit demokratik e juridik dhe mbi të gjitha marrje e së drejtës për grevë – me fjalë të tjera është gabim shumë i madh”, ka shkruar Hykolli.
Ndryshe, në media ka qarkulluar sot një email, në të cilën Sekretari në detyrë i Ministrisë së Financave, Enis Spahiu, paralajmëronte se do t’i pezulloheshin pagat punëtorëve, të cilët do të merrnin pjesë në grevë.
Spahiu ka konfirmuar se ajo email ka qenë zyrtare dhe, beson ai, sipas dispozitës ligjore.
Duke e cituar nenin 18, pika 1, i cili thotë se “Gjatë zhvillimit të grevës pezullohen detyrimet, që rrjedhin nga Kontrata e Punës, duke përfshirë të drejtën në pagesë dhe detyrimin e bindjes për të punuar”, U.D i Sekretarit beson se një punëtor që hyn në grevë nuk duhet të paguhet.
“Pra, kjo i bie që edhe nëse për një orë një zyrtar është në grevë, për një orë nuk ka përgjegjësi për të punuar dhe nuk paguhet”, thotë Spahiu.
