Klisman Kadiu, këshilltar politik i zv.kryeministrit Besnik Bislimi ka treguar për Tëvë 1 arsyet e themelimit të këtij Grupi Punues, duke theksuar se Kosova është vendi i vetëm në rajon që ende nuk ka aplikuar për anëtarësim në BE.
“Qeveria e Republikës së Kosovës ka marrë një zotim politik që këtë vit të aplikojmë për anëtarësim në Bashkimin Evropian. Ne besojmë se ky zotim për ta bërë hapin e ardhshëm drejt anëtarësimit në BE, është i domosdoshëm dhe në kohën e duhur. Jemi të përkushtuar të zbatojmë pjesën tonë të detyrimeve dhe të intensifikojmë bashkëpunimin me shtetet anëtare dhe institucionet e BE-së për të avancuar në fazën tjetër të procesit të integrimit në BE. Në Kosovë kemi një konsensus të gjerë politik mbi këtë agjendë, derisa Integrimi Evropian përkrahet nga 93% e popullsisë në Kosovë. Në anën tjetër, Kosova është i vetmi vend nga rajoni që ende nuk ka aplikuar për anëtarësim në BE. Prandaj, Komisioni Ekzekutiv i themeluar ditën e djeshme me vendim të Qeverisë së Republikës së Kosovës, është një hap i rëndësishëm në përgatitjet e Kosovës për aplikim për anëtarësim në Bashkimin Evropian”, bëri të ditur ai.
Sipas tij, ky grup ka për synim intensifikimin e punës për koordinimin e veprimeve konkrete për procesin e aplikimit në këtë mekanizëm ndërkombëtar.
“Komisioni Ekzekutiv ndër-institucional do të jetë përgjegjës për përgatitjen e aplikimit për anëtarësim në Bashkimin Evropian. Ky Komision ka për synim intensifikimin e punës për ndërmarrjen dhe koordinimin e veprimeve konkrete për procesin e aplikimit dhe të gjitha detyrat dhe obligimet që rrjedhin nga akti i aplikimit. Roli kryesor do të jetë koordinimi i veprimeve ndër-institucionale duke mundësuar përgatitjen e aplikimit dhe dokumenteve shtesë për aplikim në BE”, shtoi ai.
Po ashtu, Kadiu ka treguar edhe përbërjen e këtij Komisioni, duke shtuar se do të kryesohet nga kryeministri i Kosovës, Albin Kurti.
“Komisioni Ekzekutiv kryesohet nga Kryeministri derisa anëtarët të tjerë janë Zëvendëskryeministri i parë, Zëvendëskryeministrja e dytë/Ministrja e Punëve të Jashtme dhe Diasporës, Ambasadori i Republikës së Kosovës në Belgjikë. Me qëllim të koordinimit institucional për çështje të këtilla të rëndësisë shtetërore, pjesë e Komisionit do jetë edhe Presidenca dhe Kuvendi, institucione të cilat së shpejti do të emërojnë pjesëmarrësit e tyre. Komisioni Ekzekutiv do të përkrahet gjithashtu edhe nga një Sekretariat i koordinuar nga Zëvendeskryeministri Bislimi, si udhëheqës i proceseve të integrimit Evropian”, tha ai./teve1.info/
