Kosova ka bërë hapin e parë drejt aplikimit për anëtarësim në Bashkimin Evropian, proces të cilin Qeveria Kurti është zotuar që do ta kryejë brenda vitit.
Në mbledhjen e ekzekutivit të mbajtur të mërkurën, kryeministri ka bërë të ditur se është themeluar grupi ndër-institucional që do ta bëjë përgatitjen e këtij aplikimi.
“Kosova është i vetmi vend nga rajoni që ende nuk ka aplikuar për BE. Ne jemi shtet evropian që beson dhe përfaqëson vlerat mbi të cilat është themeluar BE – ato të respektit për dinjitetin njerëzor, lirisë, barazisë, demokracisë, sundimit të ligjit dhe respektimin e të drejtave të njeriut, përfshi pakicave”, u shpreh Kurti.
Për njohësin e çështjeve politike, Gazmir Racin, aplikacioni për anëtarësim në BE duhet të përgatitet në mënyrën më të mirë të mundshme në mënyrë që të mos kthehet prapa.
“Është momenti ideal që Kosova po e fillon një fazë të re në raporte me Bashkimin Evropian. Ky komitet ndërinstitucional po ashtu duhet ta luajë një rol shumë të rëndësishëm jo vetëm në aspektin politik të përgatitjes së aplikacionit por ai komitet duhet të shoqërohet edhe me një grup të ekspertëve për ta përgatit aplikacionin në mënyrë që të mos kthehet për koment nga Komisioni”, tha Raci.
Megjithatë, sipas njohësit të integrimeve evropiane, Arbnor Sadiku, Kosova deri më tani ka çaluar në zbatimin në praktikë të Marrëveshjes së Stabilizim-Asociimit.
“Shumica e bizneseve të Kosovës kanë pasur problem për plasim dhe konkurrencë me vendet e tjera të rajonit në kuptimin e tregut sepse ti si prodhues i Kosovës për të aplikuar në vende të BE-së duhet t’i plotësosh disa standarde dhe unë mendoj kur kanë hy në konkurrencë me vende tjera prodhuesit e Kosovës, disa kanë qenë pozitiv po për shumicën ka pasur vështirësi”, deklaroi Sadiku.
Televizioni ka dërguar pyetje në adresë të Qeverisë dhe Ministrisë së Punëve të Jashtme për të ditur më shumë mbi kompetencat e përbërjen e grupit ndërinstitucional, por deri në publikimin e kronikës nuk ka marrë përgjigje.
Kosova ka dorëzuar aplikimin për anëtarësim në Këshill të Evropës teksa po përgatitet aplikimi për anëtarësim edhe në Partneritetin për Paqe të NATO-s.
Kronika e gazetarit Gojart Jashari.
