Përmes njoftimit, Sindikata bëri të ditur se ministrit i janë paraqitur kërkesat e zyrtarëve policorë për Ligjin e Pagave, Ligjin për Pensionimin, sigurimin shëndetësor si dhe udhëtimin.
Sipas Sindikatës, Sveçla ka theksuar se së shpejti Ligji i Pagave do të del në diskutim publik, teksa Ligji për Pensionim është duke u shqyrtuar nga Ministria e Financave.
“Në ketë takim, Kryetari i Sindikatës së PK-së ka paraqitur kërkesat e zyrtarëve policor dhe punonjësve të PK-së siç janë: Ligji i pagave, Ligji për pensionim, sigurimi shëndetësor, udhëtimi etj. Ministri z. Sveçla u zotua se do të bëjë angazhimin e tij maksimal për realizimin e kërkesave tona duke u mos ndalur deri në realizimin e plotë të kërkesave dhe nevojave të Policisë. Sa i përket Ligjit të pagave ai tha se shpejti do të del në diskutim publik, kurse Ligji për pensionim është duke u shqyrtuar nga Ministria e financave”, thuhet ndër tjerash në njoftim.
Kurse, sa i përket sigurimit shëndetësor, ministrit thuhet se ka deklaruar se do të punojnë së bashku për të gjetur mundësinë e realizimit të kësaj kërkese me prioritet.
“Për kushtet dhe kërkesat tjera, ai njoftoj se Bordi i OSHP-së është duke punuar intensivisht për realizimin e projekteve të cilat janë në progres. Sindikata e Policisë do të mbetet në kontakt të vazhdueshëm me të gjitha institucionet shtetërore të Republikës së Kosovës, me qëllim të realizimit të kërkesave dhe përmirësimit të mirëqenies së pjesëtarëve të Policisë”, thuhet ndër tjerash në njoftim./teve1.info/