Pekini i cili për ditë me radhë realizoi stërvitje të artilerisë në Ngushticën e Tajvanit, ripërsëriti kërcënimin për të sulmuar ishullin vetëqeverisës.
Gjatë një konference për medie, zëdhënësi i Ministrisë së Jashtme kineze, Wang Wenbin theksoi se tentativa e Tajvanit për ta kërkuar pavarësinë vetëm se do ta përshpejtojë shkatërrimin e tyre.
“Ne paralajmërojmë autoritetet e Tajvanit se bashkëpunimi i tyre me forcat e jashtme për të kërkuar pavarësinë vetëm do të përshpejtojë shkatërrimin e tyre dhe e shtyjnë Tajvanin në humnerën e katastrofës. Kërkimi i tyre për pavarësinë e Tajvanit nuk do të ketë kurrë sukses dhe çdo përpjekje për të tradhtuar interesat kombëtare do të përballet me një dështim të plotë”, ka thënë Wenbin.
Wang Wenbin tha se SHBA-ja është shkaktari i tensioneve aktuale midis Kinës dhe Tajvanit.
“Shkaku i tensioneve aktuale në Ngushticën e Tajvanit është i qartë dhe meritat historike janë të njohura për të gjithë, se SHBA është provokatori dhe ngatërrestari. SHBA duhet ta pranojë natyrën skandaloze të vizitës së qëllimshme të Pelosit në Tajvan e të reflektojë mbi pasojat e rënda që burojnë prej saj”, theksoi ai.
Tensionet midis Kinës dhe Tajvanit janë rritur pasi javën e kaluar kryetarja e Dhomës së Përfaqësuesve, Nancy Pelosi, së bashku me një delegacion të Kongresit amerikan, vizitoi Tajvanin.
Kina pretendon se Tajvani është provincë e saj dhe refuzon që të përjashtojë mundësinë e përdorimit të forcës për të rimarrë kontrollin e ishullit. /teve1.info/
