Krasniqi ka thënë se vepra e këtyre heronjve do të jetë përherë e mbuluar me lavdinë e përjetshme të historisë së lirisë së Kosovës.
“Sot, me nderimet më të larta kujtojmë heroin Bekim Berisha-Abeja dhe bashkëluftëtarët e tij, Bedri Shala, Elton Zherka dhe Përmet Vula, të cilët dhanë jetën më 10 gusht të vitit 1998 në Betejën e Junikut. Me përvojën e tij luftarake në Kroaci e Bosnje, ‘Abeja’ u shqua për kontributin e tij të madh në luftën e Ushtrisë Çlirimitare të Kosovës, për çlirimin e atdheut. Vepra e këtyre heronjve të kombit, do të jetë përherë e mbuluar me lavdinë e përjetshme të historisë së lirisë së Kosovës!”, ka shkruar ai në një postim në Facebook.
Po ashtu, për Berishën, Shalën, Zherkën, Vulën ka shkruar edhe kreu i AAK-së, Ramush Haradinaj.
Ai ka thënë se historia shqiptare është histori sakrifice e heroizmi.
“9 dhe 10 gushti i vitit 1998, ishte dëshmitar i trimërisë së luftëtarëve të pashoq të Zonës Operative të Dukagjinit, Bekim Berisha – Abeja, Bedri Shala, Elton Zherka, Përmet Vula, Sokol Sejfijaj e Jusuf Kelmendi. Gjithashtu, po atë ditë, jehoi pushka çlirimtare e luftëtarëve të lirisë, Agim Bajrami – Zefi, Xheladin Kurtaj e Besnik Begunca, në Zonën Operative të Nerodimes. Luftëtarë të pashoq, trima e atdhetarë, që para jetës së tyre e vendosën lirinë e Atdheut të pushtuar. Ky heroizëm, frymëzon dhe formëson brezat, motivon për Atdheun e fortë”, tha Haradinaj. /teve1.info/