Përmes një postimi në Facebook, Kurti ka falënderuar Duan për përfaqësim dinjitoz dhe promovim të vlerave të Kosovës kudo në botë.
Madje, ai ka vlerësuar se kontributi i saj për Kosovën është i pamatshëm.
“U mbajt në Prishtinë, aty ku e ka vendin. Kosova shkëlqen ndryshe me Sunny Hill dhe vajzën tonë të artë, Dua Lipa, të cilën sot e prita në Kryeministri. Vendi ynë po shënon një nga vitet më të suksesshme kulturore në historinë e tij. Duan e falënderova për përfaqësimin e bukur e dinjitoz dhe promovimin e vlerave të Kosovës kudo në botë. Zëri, muzika e kënga e saj, na kanë bërë shumë më të njohur dhe mirënjohur anembanë. Kontributi që ajo jep për Kosovën është i pamatshëm”, thuhet ndër tjera në postim.
Tutje, kryeministri shtoi se pas katër ditë performancë muzikore me emra të njohuar ndërkombëtarë dhe vendorë në festivalin “Sunny Hill”, është momenti për falënderim ndaj këngëtares për këtë organizim.
“Festivali ‘Sunny Hill’ i shton shije jetës së pasur kulturore të shtetit tonë. Pas katër ditë performancë muzikore me emra të njohur ndërkombëtarë dhe vendorë, është momenti t’u themi faleminderit Duas dhe gjithë ekipit për punën dhe promovimin që i bënë Kosovës. Sunny Hill është edhe dobi për ekonominë lokale, ndërsa sivjet edhe mbështetje ndaj angazhimeve shtetërore për liberalizimin e merituar të vizave për qytetarët e Kosovës”, thuhet ndër tjerash në postim./teve1.info/
