Neni 5 i ligjit bazik për financimin e partive politike, ka gjithsej 4 paragraf, por me ndryshimet që pritet të bëhen do t’i shtohet edhe paragrafi i pestë, i cili do të ndalojë partitë politike që të marrin fonde anonime.
Ky paragraf do të ketë këtë formulim:
5. Kontributet anonime janë rreptësisht të ndaluara. Çdo kontribut duhet të ketë informacionin e qartë në lidhje me kontribuesin, duke përfshirë emrin, adresën dhe numrin e letërnjoftimit për individët, si dhe emrin e biznesit, emrin e pronarit, adresën e selisë dhe numrin e regjistrimit të biznesit dhe/ose numri fiskal për bizneset si dhe data e kontributit.
Nenit 9 të ligjit bazik, Ndarja e mjeteve financiare publike, në paragrafin e tij të parë, me ndryshimet që do të bëhen do t’i shtohet edhe një fjali e cila ka të bëjë me ndarjen e mjeteve brenda koalicionit.
Në rast të koalicionit, shpërndarja e fondeve do të bëhet në bazë të numrit të deputetëve që përfaqësojnë secilin subjekt politik brenda koalicionit dhe fondet i shpërndahen drejtpërdrejt subjektit politik, përfshirë rastet pas pushimit të ekzistimit të koalicionit.
Në dokumentin që ka siguruar tëvë1, shihet se ligjit për financimin e partive, te nenin 15, në paragrafin 3, do t’i shtohet edhe nënparagrafi 3.6, i cili do të rregulloi çështjen e kredive të partive politike.
3.6 Informacionet për çdo kredi të marrë nga subjektet politike, ose në emër të subjekteve politike, duke përfshirë shumën e kredisë, periudhën e kthimit, informacionin mbi kolateralin dhe/ose garancinë hipotekare, garantuesit e kredisë dhe çdo informacion tjetër që lidhet me kredinë.
Këto plotësim-ndryshime në ligjin për financimin e partive politike, së bashku me disa ndryshime në ligjin për zgjedhjet e përgjithshme, ishin paraparë që të diskutoheshin në seancën e së enjtes, por kjo pikë e rendit të ditës, është shtyrë për seancën e ditës së premte.
Raporti i gazetarit Valmir Gallopeni.
