I pandehuri ka zënë vendin. Pas tij, arritën edhe pala paditëse.
Në Gjykatën Themelore në Prishtinë, të enjten është thënë fjala përfundimtare në një rast që ka të bëj me veprën penale marrje ryshfeti.
I akuzuar për këtë, është ish-drejtori i Administratës dhe Financave në Komisionin e Pavarur për Media, Arben Bilalli,
Ky i fundit sipas aktakuzës së prokurorisë, kërkoi dhe mori ryshfet nga kompania “Telkos” .
Për këtë, organi i akuzës kërkoi nga trupi gjykues që Bilalli ta merr dënimin e merituar.
“Këtë vepër penale, i pandehuri Arben Billalli e ka kryer me dashje, duke qenë i vetëdijshëm për pasojat dhe duke pasur për qëllim t’i sjell pasuri. Andaj prokuroria mbetet pranë aktakuzës dhe i propozon gjykatës që të njëjtin ta shpall fajtor dhe t’i shqiptohet dënimi si në aktakuzë”, tha Merrushe Llugiqi, prokurorja e rastit.
E të njëjtën gjë e kërkoi edhe avokati i kompanisë “Telkos”.
Por, shtoi që të kihen parasysh të gjitha rrethanat rënduese.
“Gjatë takimeve, njëri nga pronarët e Telkos, e i përkujton disa herë që jemi duke bërë punë të keqe dhe rrethanat e tjera, që do ta ndalonin në kryerjen e veprës penale, por i njëjti insiston në kryerjen e veprës penale. Po ashtu mosha e pjekurisë…”, tha Naim Rudari, avokati i kompanisë “Telkos”.
E të kundërtën e kësaj, e kërkoi avokati mbrojtës i Arben Billallit, Florent Latifaj.
“Siç e dini i mbrojturi im, Arben Billali e ka pranuar fajësinëm, i njëjti edhe gjatë fazës së hetimeve e ka pranuar fajësinë. Ka qenë bashkëpunues me organet, duke pranuar të gjitha veprimet e tij, të gjitha këto rrethana të parapara me nenin 70 paragrafi 3, të cilat me doemos ndikojnë në zbutjen e dënimit”, tha ai.
Pas kësaj, gjykatësi Alban Ajvazi, kishte një pyetje për të pandehurin, Arben Bilalli.
“Arben, a e përkrah avokatin?”, tha Ajvazi.
“Po dhe ndihem fajtor dhe me vjen keq për atë që ka ndodhur..”, u përgjigj Bilalli.
Më këtë, trupi gjykues u tërhoq për konsultim.
Pas 20 minutash, këta u kthyen me vendimin për 140 ditë burgim dhe 12 mijë euro gjobë.
Pala e dënuar, nuk pranuan të flasin para kamerës.
Por, të pakënaqur me këtë dënim, u shprehen pala e dëmtuar.
Sipas aktakuzës së prokurorisë, Bilalli po akuzohej bashkë me ish-kryeshefin e KPM-së, Luan Latifi se në bashkëkryerje kanë kryer veprën penale “Marrja e ryshfetit”.
Ndërsa seanca për Latifin, është caktuar në muajin tetor.
Raporti i gazetarit Fidan Zejnullahu.
