Publicisti, Kim Mehmeti ka komentuar protestën e studentëve në Shqipëri, duke shprehur habinë se si ajo ka arritur të mbijetojë, përkundër presioneve dhe përpjekjeve për ta shuar, siç ka pretenduar ai.
Në emisionin “Këndi i Debatit” në Tëvë1, Mehmeti e ka cilësuar Shqipërinë si “narkoshtet”, ndërsa ka akuzuar oligarkët, grupet kriminale dhe politikanët për ndikim në institucionet shtetërore dhe në media.
Sipas tij, vendi është nën ndikimin e një aleance interesash, ku bëjnë pjesë oligarkë të pasuruar në mënyrë të dyshimtë, grupe kriminale dhe politikanë që, siç u shpreh ai, veprojnë në funksion të tyre.
“Duhet të merremi vesh, Shqipëria është narkoshtet. Shqipërinë e ka në dorë ajo që e quaj unë ‘aleanca e qelbësirave’, ku bëjnë pjesë oligarkë që në mënyrë të çuditshme janë pasuruar, ku bëjnë pjesë narkomania, ku bëjnë pjesë këta politikanët e shitur që tash përdoren si paçavure aty.Aty keni parti që në të vërtetë janë sekte, sepse i ushqen i njëjti grazhd krimi. I ushqen atje në të vërtetë bile edhe institucionet shtetërore, edhe mediat i ushqen krimi. Dhe prandaj, në një shtet të atillë, është e çuditshme si kjo protestë mbijetoi deri sot, e jo si nuk u shua. Është e çuditshme sepse aty financohen para me thasë”, ka deklaruar Mehmeti.
Ai ka drejtuar kritika edhe ndaj kryeministrit Edi Rama, duke pretenduar se përmes nismave të reja ligjore po krijohen mekanizma për kufizimin e protestave dhe ndëshkimin e qytetarëve që marrin pjesë në to.
“Shihni se çfarë bën piktori (Edi Rama), sjell ligje me të cilat e ndalon. Ai edhe pak do ta ndalojë që ta duash Shqipërinë, por ai do ta legalizojë hajninë edhe tradhtinë, sepse ai ka sjellë ligje shpejt e shpejt që, me të takuar aty ku mbahen protestat e dhunshme, menjëherë të merr dhe të burgos”, është shprehur ai.
Mehmeti ka folur edhe për reagimin e policisë ndaj studentëve protestues, duke vënë në pikëpyetje shpenzimet për pajisjet e përdorura gjatë protestave, në një kohë kur, sipas tij, ka mungesë të mjeteve për nevoja të tjera publike.
“Shihni se çfarë dhune përdoret ndaj studentëve, shihni se si përnjëherë ai gjeti mjete që të blejë ato cisternat me ujë, plumba gome, gaz lotsjellës. A nuk ka para për ilaçe? Edhe madje thotë se këto mjete ia kanë dhënë shtetet mike, po cilat janë ato shtete?”, ka thënë Mehmeti.
Në vijim, ai ka ngritur pretendime edhe për përfshirjen e shteteve të huaja në sigurimin e pajisjeve dhe trajnimin e policisë shqiptare, duke përmendur Emiratet e Bashkuara Arabe dhe Izraelin.
“Atje flitet më hapur se aeroplanët nga Emiratet Arabe kanë sjellë këto autobote shpejt e shpejt. Flitet që kanë sjellë edhe persona të maskuar nga Izraeli që i kanë trajnuar policët shqiptarë. Do të thotë, atje erdhi puna që të huajt ta mbrojnë Shqipërinë nga shqiptarët”, ka përfunduar Mehmeti./teve1.info/







