Agjencia e Ushqimit dhe Veterinarisë (AUV) ka urdhëruar ndalimin e prodhimit dhe tërheqjen nga tregu e produkteve të mishit në njërën prej kompanive në Pejë, pasi në “Suxhuk shtëpiak” është konstatuar ADN e pulës, ndonëse në deklaracion figurojnë vetëm mish dhe yndyrë lope.
Sipas rezultateve të analizave laboratorike të kryera në Bullgari, në mostrën e marrë nga inspektorët e AUV-së është konfirmuar prania e ADN-së së gjedhit dhe pulës.
AUV ka bërë të ditur se rezultati ngre dyshime për praninë e përbërësve me origjinë nga pula që nuk janë deklaruar në produkt, ndërsa verifikimet e mëtejshme do të përcaktojnë burimin dhe llojin e materialit të përdorur.
“Gjetja laboratorike i referohet produktit ‘Suxhuk shtëpiak’ të testuar dhe nuk nënkupton se e njëjta mospërputhje është konstatuar në produktet e tjera të operatorit”, thuhet në njoftimin e AUV-së.
Agjencia ka theksuar se kontrollet e mëtejshme do të përcaktojnë shtrirjen e mundshme të parregullsive dhe masat e mëtejshme administrative e inspektuese./teve1.info/
