Ministria e Drejtësisë ka mbajtur takimin e Grupit Punues ndërinstitucional, me përfaqësues nga institucionet e Republikës së Kosovës, duke përfshirë Këshillin Gjyqësor të Kosovës, Ministrinë e Punëve të Jashtme dhe Diasporës, si dhe Zyrën e Kryeministrit, për procesin e përgatitjes së Republikës së Kosovës për aderim në Konventën Ndër-Amerikane për Vuajtjen e Dënimeve Penale Jashtë Vendit.
Përmes njoftimit zyrtar bëhet e ditur se, gjatë takimit, Grupi Punues ka shqyrtuar aspektet juridike dhe institucionale të këtij procesi.
Sipas MD-së, aderimi në këtë Konventë synon të krijojë një bazë të rëndësishme juridike për bashkëpunimin ndërkombëtar në fushën e transferimit të personave të dënuar, duke mundësuar që në përputhje me kushtet dhe procedurat e përcaktuara në Konventë, personat e dënuar të mund të vuajnë pjesën e mbetur të dënimit në shtetin e tyre.
“Konkretisht, nëse një shtetas kosovar është duke vuajtur një dënim të shqiptuar nga ndonjë shtet palë në këtë Konventë, ai ose ajo do të ketë mundësinë të transferohet në Republikën e Kosovës që pjesën e mbetur të dënimit ta vuajë në Republikën e Kosovës”, thuhet në njoftim.
Në fund, ministria ka theksuar se ky proces përbën një hap të rëndësishëm në zgjerimin e bashkëpunimit juridik ndërkombëtar të Republikës së Kosovës dhe në forcimin e mekanizmave të bashkëpunimit me shtete të ndryshme, përfshirë SHBA-në dhe Ukrainën, në fushën e drejtësisë penale.
