Shefi i Grupit Parlamentar të PDK-së, Arian Tahiri, në gjashtë vjetorin e arrestimit të ish-krerëve të UÇK-së, ka deklaruar se procesi gjyqësor ndaj tyre, sipas tij, nuk ka të bëjë me drejtësinë, por me përpjekjen për të ndryshuar narrativen historike për Kosovën.
Duke folur në seancën e sotme të Kuvendit të Kosovës, deputeti Tahiri tha se kontributi dhe emrat e të akuzuarve në Hagë nuk mund të zhbëhen nga procesi gjyqësor, raporton KosovaPress.
“Gjyqi ndaj tyre nuk ka lidhje me drejtësinë, por me përmbysjen e historisë, nuk ka lidhje me zbardhjen e së vërtetës, por me ndërtimin e një narrative të rreme për Kosovën. Është një inxhenerim politik që po shndërron rezistencën tonë në faj, atyre në Hagë mund t’ua vrasin kohën, por jo kontributin dhe as emrat. Emrat e tyre, historia e tyre dhe e vërteta që përfaqësojnë është shumë më e madhe se ajo gjykatë”, tha Tahiri.
Ai tha se çështja e Hagës i tejkalon dallimet partiake dhe politike, duke e cilësuar atë si një betejë kombëtare, shtetërore dhe historike. Ai adresoi disa pyetje për bashkësinë ndërkombëtare.
“Beteja në Hagë i tejkalon partitë, politikat ditore dhe dallimet tona. Duhet të jemi në betejë bashkërisht sepse është betejë kombëtare, shtetërore dhe historike. Sot kur po hymë në vitin e shtatë të kësaj pritje, nga ky kuvend duhet të kemi një mesazh për Bashkësinë ndërkombëtare dhe veçanërisht për BE-në. Kosova ju besoi kur kërkonte shpëtim nga regjimi i Millosheviqit, kur kërkonte liri. Sot pyesim ku janë standardet e barabarta, ku është zëri i Evropës? A është kjo Evropa e vlerave që na është premtuar? Nuk po ju kërkojmë të mbani anën e askujt, por anën e drejtësisë, të mbroni drejtësinë nga çdo ndikim”, tha Tahiri.
Gjashtë vjet më parë, më 4 dhe 5 nëntor 2020, nisi një nga kapitujt më të rëndësishëm dhe më të ndjeshëm të zhvillimeve gjyqësore për ish-krerët e Ushtrisë Çlirimtare të Kosovës.
Brenda një dite, në Hagë u dërguan katër figura të rëndësishme të skenës politike të Kosovës: Hashim Thaçi, Jakup Krasniqi, Kadri Veseli dhe Rexhep Selimi. Që nga ajo kohë, ata u përballën me proceset gjyqësore në Dhomat e Specializuara. Po atë ditë, nga Aeroporti Ndërkombëtar “Adem Jashari” u nis aeroplani drejt Hagës, me katër ish-krerët e UÇK-së, të cilët që nga ajo kohë u përballën me procesin gjyqësor në kuadër të Dhomave të Specializuara.
Pas rreth gjashtë vjetësh të procesit gjyqësor, më 16 shtator të këtij viti u shpall vendimi i shkallës së parë, ndaj të cilit pritet të vazhdojë procedura e ankimimit.
Ndërkohë, më 17 nëntor pritet të merret një tjetër vendim për ish-presidentin Hashim Thaçi, kësaj radhe në rastin e dytë gjyqësor që lidhet me pretendimet për tentim-pengim të drejtësisë.
